تخيل السيناريو ده معايا يا دكتور. خلعت لعيان ضرس وبعدها بشهور طويلة جالك العيان ده تاني عشان يعمل اشعة متابعة او يزرع مكان الضرس المخلوع. بصيت في الاشعة لقيت مكان الخلع لونه ابيض جداً، ابيض اكتر من العضم الطبيعي اللي حواليه.
اول حاجة هتيجي في بالك ايه؟ هل ده بقايا جذر retained root fragment انا سبته ومخدتش بالي؟ ولا ده التهاب؟ ولا ايه الحكاية بالظبط؟ في الحالة دي غالباً انت قدام ظاهرة اسمها Sclerotic Bone Healing.
ايه هو الـ Sclerotic Bone Healing؟
التعريف ببساطة هو التئام مكان الخلع او اي منطقة جراحية عن طريق تكوين عضم كثيف ومتصلب sclerotic bone. يعني بدل ما الجسم يكون عضم جديد بنفس مواصفات العضم الطبيعي، بيكون عضم مضغوط وكثيف زيادة عن اللزوم.
شكله ايه في الاشعة؟ Radiographic Features
عشان تميزه ومتتلخبطش بينه وبين حاجة تانية، ركز في المواصفات دي:
مكانه Location
ممكن يحصل في اي مكان في الـ maxilla الفك العلوي او الـ mandible الفك السفلي.
الحدود بتاعته Edge
حدوده بتكون واضحة well-defined او نقدر نقول انها محددة كويس في مكانها well-localized.
شكله Shape
شكله بيختلف. احياناً ممكن ياخد نفس شكل جذور السن اللي اتخلع may resemble shape of extracted tooth roots. ولو كان في منطقة جراحة بيكون شكله غير منتظم irregular.
التكوين الداخلي Internal structure
بيكون radiopaque معتم للاشعة، ودرجة عتامته اكتر من العضم اللي حواليه. كمان بيفقد شكل العضم الطبيعي الشبكي a loss of normal trabecular pattern.
العدد Number
ممكن يكون في مكان واحد single او في كذا مكان multiple sites.
نقط اساسية لازم تعرفها Key points
الظاهرة دي بتحصل كتير لما بيتم استخدام طعوم عظمية غير متوافقة حيوياً non-biocompatible bone grafts زي الطعوم اللي من مصادر حيوانية او جثث cadaver or animal bone. ده بيمثل استجابة التئام مختلفة altered healing response من الجسم، فبيكون عضم اكثف من الطبيعي.
ايه اهميته الاكلينيكية؟ Clinical significance
طيب هل الموضوع ده يقلق؟ هو في حد ذاته مش مرض، لكن ليه اهمية كبيرة لازم ناخد بالنا منها:
-
جودة العضم: ممكن يأثر على جودة العضم في المنطقة دي لو فكرت تعمل اي حاجة في المستقبل زي زراعة الاسنان implant placement.
-
الامداد الدموي: العضم الكثيف ده ممكن يأثر على الامداد الدموي في المنطقة وعلى عملية الايض العظمي bone metabolism.
-
خطة العلاج: وجوده بيخليك محتاج تاخد احتياطات معينة وانت بتحط خطة العلاج.
-
التشخيص التفريقي: الاهم من كل ده انك تقدر تفرقه عن الحالات المرضية التانية pathological conditions او بقايا الجذور retained root fragments.
ملاحظة اخيرة
مهم نقول تاني ان الـ Sclerotic bone healing مش حالة مرضية في الغالب، لكن لازم دايماً نربط اللي شايفينه في الاشعة بالتاريخ المرضي للعيان والفحص الاكلينيكي. جودة العضم المختلفة دي ممكن تأثر بشكل مباشر على خيارات العلاج المتاحة في المنطقة المصابة.
