ليه أي دكتور اسنان محتاج يتعلم Dental photography و ايه أهميته للدكتور والعيادة.
تعالى نعرف النهاردة 10 أسباب ليه انت محتاج تتعلم Dental photography
شخّص بدقة
التصوير في جلسة الكشف مهم جدا لانه هيزود ثقة المريض فيك، ده غير انه هيسمحلك تشرح الخطة العلاجية كويس للمريض و تكسب ثقته، و ده ببساطة لانه هيكون شايف كل حاجة انت بتشرحها و مش هيشك في كلامك.
كمان التصوير هيزود قيمة جلسة الكشف قدام المريض و دي مشكلة ناس كتير بتعاني منها ان المرضى من مقدرين جلسة الكشف و شايفينها فلوس على الفاضي، فالتصوير هيكون عامل مساعد ان المرضى تفهم أهمية جلسة الكشف
تواصل مع المريض
زي ما اتكلمنا في التشخيص، فالتصوير مهم جدا للتواصل مع المريض لانه هيكون الوسيط بين شرحك اللي فيه مصطلحات طبية و المريض، بالإضافة انه هيسهل على المريض تخيّل الخطة العلاجية، و ممكن يكون سبب قوي ان المريض يكمل معاك
تواصل مع المعمل
للأسف الامبرشن لوحده مش سبب كافي ان المعمل يظبطلك التركيبة من اول مرة زي ما انت عايز، الصور هتسهل جدا تواصلك مع المعمل و هتديله صورة أوسع للمعان اللي هتتحط فيه السنة.
على سبيل المثال شوف الصورة دي، المعمل كان شبه مستحيل يطلع التركيبة بالشكل ده بدون الـ Dental photography.
عشان كده مهم تجهز صور البيشنت بتاعك عشان لو المعمل طلبها، او ممكن انت تبعتهاله كمان بدون ما يطلبها
متابعة المريض
التصوير مهم جدا للمتابعة مع المريض بعد الشغل و فرصة ليك انك تختبر الخامات اللي بتستخدمها و البروتوكول اللي بتتبعه في الشغل.
متابعتك للمريض بعد اشهر و سنين هتديك نظرة اشمل لشغلك و العيوب اللي ممكن متلاحظهاش في البداية
وضع الخطة العلاجية
مهم جدا تراجع صور المريض بعد جلسة الكشف، و بره ضغط الشغل و العيادة؛ لان ده ممكن يخليك تشوف مشاكل مكنتش واخد بالك منها و ده هيحسن جدا من شغلك و هيخليك عارف و مجهز كل حاجة هتعملها قبل ما تبدأ شغل
تسويق
طبعا اهتمامك بالصور و عرضها على صفحات السوشيال ميديا بتاعتك هيخلي ناس كتير تشوفها و تبقى عايزة تاخد نفس الخطة العلاجية.
كمان التصوير هيساعدك توصل فكرتك احسن لو حبيت تعمل فيديوهات على السوشيال ميديا تشرح فيها طريقة العلاج اللي بتستخدمها مع الحالات.
و ممكن تستخدم صور لحالاتك اللي انت خلصتها في انك تشرح الخطة العلاجية لمريض جديد عندك و تقله انك اشتغلت نفس حالته قبل كده و لما يشوف الصور هيكون عنده تخيل للشكل اللي هيشوفه بعد العلاج.
تطوير مهاراتك
زي ما التصوير هيجليك تشوف المشاكل قبل الشغل، هو كمان هيوريك عيوب شغلك، و ياريت في المرحلة دي متحبطش، مع اكتشافك لعيوبك مهم انك تبدأ تشتغل عليها و تطورها و تقارن شغل عن طريق الصور عشان تعرف مستواك و مدى تطورك.
عمل بورتفوليو
لو انت طالب او لسه مفتحتش عيادة فالبورتفوليو او معرض الاعمال مهم جدا ليك.
و بورتفوليو يعني تصوير، فاهتمامك بتصوير حالاتك هيكون مفيد جدا ليك و هيخليك تبني بورتفوليو محترم و ده بدوره هيزود فرصك في الشغل
Medico-legal
الصور هتكون وسيلة مهمة جدا في حمايتك ضد أي اتهام كاذب عليك.
تصويرك لحالاتك هيحميك من ان حد يشتكيك بشوى كاذبة، و ده للأسف انتشر كتير الفترة اللي فاتت، فمهم جدا يكون معاك صور لشغلك لان بالصور دي تقدر تدافع عن نفسك كويس قدام القانون.
نسخ الاشعة
فيه دكاترة كتير معندهاش القدرة انها تشتري سينسور، و الحل هنا في التصوير.
تعرف انك بالتصوير فقط ممكن تاخد صور للاشعة بتاعتك تكون قريبة جدا من الصور اللي بالسينسو، و ده موضوع مهم هنتكلم عنه قريب هنا على دكتور لود، فخليك دايما متابع.
دول كانوا اهم اسبابك لتعلم الـDental photography و استنى مقالات كتير جاية عن التصوير بالموبايل و افضل الأدوات المتوفرة في السوق المصري، و لكن لغاية ما المقالات دي تنزل ابدأ من دلوقتي صور حالاتك حتى لو الجودة كاانت ضعيفة ولكن كل حاجة بتيجي بالتدريج
