حلم العيادة الخاصة ده شاغل بال اغلبنا. فكرة انك تكون مدير نفسك، تبني اسمك، وتعمل المكان اللي شبهك وشبه رؤيتك لطب السنان. بس بين الحلم والواقع فيه حفرة كبيرة اسمها التخطيط، وكتير مننا للأسف بيقع فيها لأنه بيتجاهل خطوة اساسية ومصيرية: دراسة الجدوى Feasibility Study.
كتير من الدكاترة بيمشيها بـ “البركة” او “بالويم”، والنتيجة بتكون صدمات كتير بعد الافتتاح. مصاريف بتطلع من تحت الأرض، عدد الحالات اقل من اللي كنت بتحلم بيه، او تلاقي نفسك بتصرف من جيبك عشان تغطي تكاليف العيادة.
دراسة الجدوى دي مش ورق وكلكعة ارقام. دي الـ GPS بتاعك. هي اللي بتنورلك الطريق وبتقولك فين المطبات وفين الفرص، وفي الآخر بتساعدك تاخد القرار الصح: “اكمل في المشروع ده ولا استنى شوية؟”.
في المقالة دي، هنبسطلك الحكاية، وهنمشي معاك خطوة بخطوة في 7 خطوات عملية عشان تعمل دراسة جدوى لعيادتك زي المحترفين، وتضمن ان مشروعك يبدأ على ارض صلبة.
الخطوة الأولى: حدد هويتك – انت مين في السوق؟ Define Your Scope of Services
قبل ما تفكر في لون الكرسي او شكل اليافطة، لازم تجاوب على سؤال مهم جداً: “عيادتي هتقدم ايه بالظبط؟”.
-
هل انت هتكون “العيادة الشاملة” اللي بتعمل كل حاجة بنفسك حشو وخلع وتركيبات بسيطة؟
-
ولا هتستعين بـ اخصائيين Specialists في مجالات زي التقويم Orthodontics وزراعة الأسنان Implants؟
وجود اخصائيين معاك بيعلي من قيمة العيادة وبيجذب حالات اكتر، بس في نفس الوقت بيزود عليك تكاليف. لازم تحسبها صح: هل تكلفة وجودهم هتجيب عائد يغطيها ويزيد؟ ولا الأفضل تبدأ لوحدك وتضيف الخدمات دي بعدين؟
اجابتك على السؤال ده هتحددلك حجم المكان اللي محتاجه، عدد الغرف، ونوع الأجهزة اللي هتشتريها.
الخطوة الثانية: اعرف مريضك – انت بتكلم مين؟ Identify Your Target Audience
دي يمكن اهم خطوة في الدراسة كلها. جملة “عيادتي لكل الناس” دي جملة جميلة بس متأكلش عيش في البيزنس. كل ما كنت محدد اكتر، كل ما عرفت توصل لمريضك اسرع.
مين هو مريضك المستهدف Target Patient؟ هل هما سكان المنطقة اللي حواليك؟ هل بتستهدف الفئة الاقتصادية العالية Class A، المتوسطة Class B، ولا الشعبية Class C؟
تحديدك للمريض هيخلي قراراتك اسهل بكتير في:
-
التسعير Pricing: اسعارك في منطقة شعبية لازم تكون مختلفة تماماً عن اسعارك في منطقة راقية.
-
الديكور والتصميم Clinic Design: ديكور عيادة بتستهدف الأطفال غير ديكور عيادة تانية.
-
طريقة الكلام: حتى لباقة ومستوى تعليم السكرتيرة Receptionist لازم يكون مناسب لنوعية المرضى اللي بتتعامل معاهم.
الخطوة الثالثة: بص حواليك – الملعب فيه مين؟ Market Research
اوعى تفتح عيادتك وانت مغمض. لازم تنزل الشارع وتعمل بحثك كويس.
-
اعرف منافسينك Competitor Clinics: مين العيادات اللي في منطقتك؟ عددهم كام؟ اماكنهم فين؟ ايه الخدمات اللي بيقدموها ومستواها ايه؟ لو عرفت تجيب فكرة عن اسعارهم يبقى ممتاز.
-
اعمل جدول توقعاتك: بعد ما تلف لفتك وتشوف السوق، اعمل جدول بسيط لنفسك فيه الخدمات اللي ناوي تقدمها، وجنب كل خدمة حط:
-
العدد المتوقع للحالات شهرياً Expected Number of Patients. خليك واقعي في الأول.
-
سعر الخدمة Service Price.
-
اجمالي الدخل المتوقع من الخدمة دي شهرياً.
-
في الآخر، اجمع كل الخدمات عشان توصل لرقم تقريبي لإجمالي الدخل الشهري المتوقع Expected Monthly Revenue.
الخطوة الرابعة: جهز قايمة طلباتك The Technical Study
هنا بنبدأ نحول الكلام لأشياء ملموسة. عيادتك محتاجة ايه عشان تشتغل؟
-
التجهيزات Equipment: اكتب قايمة بكل الأجهزة اللي محتاجها كرسي اسنان، جهاز اشعة، اوتوكلاف، كومبريسور، شفاط، ادوات يدوية… الخ.
-
المواد Materials: قايمة بكل المواد الاستهلاكية اللي هتحتاجها في اول كام شهر بنج، حشوات، مواد طبعات، قطن، شاش… الخ.
-
العمالة Staff: مين هيشتغل معاك؟ هل محتاج مساعدة Assistant؟ سكرتيرة Receptionist؟ عاملة نظافة؟
الخطوة الخامسة: الحسابات – الفلوس رايحة فين وجاية منين؟ The Financial Study
دي الخطوة اللي بتخوف ناس كتير بس هي قلب دراسة الجدوى.
-
احسب تكاليف التأسيس Clinic Setup Cost: اجمع تكلفة كل حاجة في الخطوة اللي فاتت التجهيزات والمواد، وضيف عليها تكاليف تانية زي ايجار اول كام شهر، تشطيبات وديكور، رسوم تراخيص، مرتبات اول شهرين تلاتة. ده هيديلك رقم اجمالي هو “رأس المال المطلوب”.
-
هتجيب الفلوس منين؟ Funding Sources: هل معاك المبلغ كله؟ هتاخد قرض؟ عندك شريك؟ لازم تكون عارف مصادر تمويلك بالظبط.
الخطوة السادسة: من الآخر… هكسب كام؟ Profit Estimation
هنا بنجمع كل اللي فات عشان نوصل لأهم رقم.
-
الدخل المتوقع: ده الرقم اللي طلعناه في الخطوة التالتة.
-
المصاريف الشهرية المتوقعة: احسب كل مصاريفك الشهرية الثابتة ايجار، مرتبات، فواتير، وضيف عليها مصاريف متغيرة تكلفة المواد اللي بتستهلكها.
-
صافي الربح الشهري Net Monthly Profit: اطرح المصاريف من الدخل. المعادلة بسيطة:
صافي الربح = اجمالي الدخل – اجمالي المصاريف
الخطوة الأهم هنا انك تحسب حاجة اسمها “فترة استرداد رأس المال Payback Period”. يعني لو انت دفعت في تأسيس العيادة مبلغ “س”، وصافي ربحك الشهري هو “ص”، هتحتاج كام شهر عشان ترجع فلوسك؟ المدة = س / ص.
الخطوة السابعة: ساعة القرار The Decision Making
دلوقتي كل الأرقام والبيانات قدامك. بص على دراستك واسأل نفسك بصدق:
-
هل صافي الربح الشهري اللي طلع ده يعتبر مرتب كويس يستاهل التعب والمخاطرة؟
-
هل فترة استرداد رأس المال معقولة ومنطقية بالنسبالي؟ غالباً في المشاريع دي بتكون من سنتين لخمس سنين.
-
هل المشروع شكله مستقر وقابل للنمو على المدى الطويل؟
لو اجابتك على الأسئلة دي كانت “نعم” وانت مطمن، يبقى نقولك الف مبروك، توكل على الله وابدأ حلمك. ولو الاجابة كانت “لأ”، يبقى دراسة الجدوى دي عملت اهم وظيفة ليها: حمتك من قرار متسرع كان ممكن يكلفك كتير.
