فيه صوت كده كلنا بنكرهه في العيادة. صوت الكونترا Contra-angle وهي بتطلع في الروح، صوت الـ Bearings بتاعتها وهي بتصرخ وبتقول “انا بموت”. اللحظة دي مش بس بتعطلك وانت شغال، دي كمان بتفكرك بسعر الهاندبيس الجديدة اللي هتجري تشتريه.
كتير مننا فاكر ان الهاندبيس بتبوظ من كتر الشغل. لكن الحقيقة ان تسعين في المية من اعطال الهاندبيس سببها حاجة من اتنين: تزييت غلط، او تعقيم غلط.
الموضوع مش صعب ومش محتاج اجهزة غالية. هو بس محتاج نفهم ايه اللي بيحصل جوه الهاندبيس بتاعتنا لما بتدخل الأوتوكلاف، ونمشي على كام خطوة بسيطة هتخليها تكمل معانا سنين وبأحسن اداء. المقالة دي هي الزتونة اللي هتخليك تحافظ على اهم اداة في عيادتك.
العدو الأول للهاندبيس: الزيت المطبوخ The Cooked Oil Problem
عشان نفهم نعالج المشكلة ازاي لازم نعرف هي بتحصل ليه. الحكاية كلها في المعادلة البسيطة دي:
زيت + حرارة الأوتوكلاف العالية = شحم تقيل
Oil + Autoclave Heat (121-134°C) = Thick Grease
تخيل انك بتحط شحم تقيل مكان زيت الموتور في عربيتك. الموتور هيقفش وهيبوظ. ده بالظبط اللي بيحصل جوه الهاندبيس. الزيت النضيف اللي انت بتحطه، لما بيدخل الأوتوكلاف بيتحول لشحم لزج. الشحم ده بيتراكم على الـ رولمان بلي Bearings الدقيق اللي جوه الهاندبيس، فبيخنق حركته وبيحرقه مع الوقت.
التزييت الصح خطوة بخطوة The Right Lubrication, Step-by-Step
القاعدة الذهبية: الزيت الكتير احسن من القليل
اوعى تخاف تزود الزيت. الزيت الزيادة مش هيبوظ الهاندبيس، بالعكس، هو بيضمن ان الزيت وصل لكل حتة جوه وطرد اي بقايا قديمة. الزيت القليل هو اللي بيبوظها.
هتزيّت قبل التعقيم ولا بعده؟ الخناقة الأزلية
فيه مدرستين في الموضوع ده، والاتنين صح لو اتعملوا بالطريقة المظبوطة. شوف انت وفريق التمريض بتاعك ايه الأنسب ليكم وامشوا عليه.
السيناريو الأول: التزييت قبل التعقيم The Pre-Sterilization Method
دي الطريقة اللي اغلبنا بيعملها.
-
التنضيف الأول: بعد ما تخلص شغل، نضف جسم الهاندبيس من بره كويس بمنديل عليه كحول.
-
التزييت: امسك علبة الزيت ورجها كويس، وركب الـ Nozzle في فتحة دخول الهوا Drive Air Inlet (الفتحة الكبيرة). اضغط ثانيتين تلاتة لحد ما تلاقي زيت نضيف خرج من راس الهاندبيس.
-
اهم خطوة – طرد الزيت الزيادة: ركب الهاندبيس على الموتور في اليونت وحط عليها Bur قديم وشغلها 20-30 ثانية وانت لافف راسها جوه منديل. الحركة دي بتطرد كل الزيت الزيادة والشحم القديم. لازم تفضل مشغلها لحد ما المنديل يبطل يطلع زيت اسود.
-
التغليف والتعقيم: غلف الهاندبيس ودخلها الأوتوكلاف Autoclave. بالطريقة دي، انت بتضمن ان كمية الزيت اللي هتتعقم قليلة ومش هتعمل شحم كتير (1).
السيناريو التاني: التزييت بعد التعقيم The Post-Sterilization Method
دي الطريقة اللي الشركات المصنعة بتحبها.
-
التنضيف والتعقيم: نضف الهاندبيس من بره، غلفها، وعقمها في الأوتوكلاف وهي ناشفة.
-
التزييت قبل الاستخدام: لما تيجي تستخدمها، طلعها من الباكيدج وزيتها بنفس الطريقة اللي فوق.
-
طرد الزيت الزيادة: ركبها على اليونت وشغلها 20-30 ثانية عشان تطرد اي زيت زيادة قبل ما تدخل بوق المريض.
تكة من Dr. LOD: ازاي تعرف انك زيّتت كفاية؟ بعد ما تضغط الزيت، امسك راس الهاندبيس في منديل ابيض. لو لقيت الزيت اللي نازل لونه اسود او بني، يبقى لسه فيه رواسب. كمل تزييت لحد ما الزيت اللي ينزل يبقى شفاف ونضيف.
حالة خاصة: الـ Low-Speed Handpiece
دي ليها معاملة خاصة لأنها كذا جزء.
-
الموتور Motor: بيتزيت لوحده. حط الزيت في فتحة دخول الهوا وشغله شوية.
-
الكونترا انجل Contra-angle والستريت Straight handpiece: لازم تفكهم من الموتور وتزيت كل واحد لوحده من تحت، من المكان اللي بيركبوا فيه على الموتور. بعد كده ركبهم وشغلهم.
“لأ” كبيرة جداً: ممنوعات التزييت The “Don’ts”
اوعى تستخدم اي حاجة من دول في الهاندبيس بتاعتك:
-
الكلور Bleach او اي مطهرات كيميائية: هتدمر الأجزاء المعدنية وتصديها.
-
زيت الأكل او زيت العربيات: دول مش معمولين عشان يستحملوا حرارة الأوتوكلاف.
-
سبراي WD-40: ده مش زيت، ده مذيب للصدأ وهيبوظ الـ Bearings.
الحل الوحيد هو: زيت الهاندبيس المخصص Dental Handpiece Oil. الزيت ده مصمم عشان يكون متوافق حيوياً Biocompatible ويستحمل حرارة التعقيم (2).
الخلاصة: الهاندبيس استثمار مش اداة وبتترمي
الهاندبيس بتاعتك دي اداة غالية واستثمار في عيادتك. الدقايق اللي هتقضيها كل يوم في تنضيفها وتزييتها صح هي اللي هتفرق بين هاندبيس تعيش معاك سنة، وهاندبيس تانية تكمل خمس سنين.
متستخسرش فيها علبة زيت كويسة، ومتستعجلش في خطوات الصيانة. الخطوات دي هتوفر عليك آلاف الجنيهات في التصليح والشرا، وهتمنع عنك صداع انك تتعطل في نص شغل مهم.
