كل حاجة عن الـ Space Maintainer: دليلك الكامل للحفاظ على مساحة الأسنان اللبنية

فيه سيناريو معين اكيد عدى على كل واحد فينا في العيادة. طفل صغير سنانه اللبنية لسه فاضل عليها كتير عشان تبدل والضرس بتاعه بايظ خالص ومفيش امل فيه ولازم يتخلع. بتقف لحظة تفكير بعد الخلع.. هنسيب المكان ده فاضي كدا وخلاص؟ ولا فيه حاجة المفروض نعملها عشان نضمن ان السنة الدائمة لما تطلع تلاقي مكانها سليم ومندخلش في قصص تانية؟

الاجابة المباشرة والسريعة.. لا مينفعش نسيب المكان فاضي. وهنا بييجي دور جهاز اسمه حافظ المسافة Space Maintainer. ده يعتبر المنقذ في الحالات اللي زي دي عشان يمنع كوارث ممكن تحصل بعدين وتخلي الطفل يحتاج تقويم لسنين.

في المقال ده هنشرح بالتفصيل كل حاجة محتاج تعرفها عن حافظ المسافة. امتى نستخدمه وانواعه وازاي تختار النوع الصح لكل حالة.

اولاً: ايه هو الـ “Space Maintainer” او حافظ المسافة؟

ببساطة شديدة جداً حافظ المسافة هو جهاز بنركبه عشان نحافظ على الفراغ اللي سابته سنة لبنية اتخلعت قبل معادها الطبيعي Premature Loss of a primary tooth. الهدف منه انه يمنع السنان اللي جنب الفراغ ده انها تتحرك وتقفله قبل ما السنة الدائمة تكون جاهزة انها تطلع.

حافظ المسافة ليه وظيفتين اساسيتين:

• سلبي Passive: ودي الوظيفة الاساسية بتاعته انه مجرد “يحوش” المكان الموجود زي ما هو بالظبط.

• نشط Active: وده بنستخدمه لو المسافة بدأت تقفل اوريدي. الجهاز هنا مش بس بيحافظ على اللي فاضل من المسافة لا ده كمان بيشتغل كجهاز تقويم صغير عشان “يسترجع” المسافة اللي اتقفلت. وفي الحالة دي بنسميه Space Regainer.

ثانياً: ليه الموضوع مهم؟ ايه اللي هيحصل لو طنشنا؟

دي اهم نقطة لازم تتشرح كويس جداً للأهل عشان يستوعبوا اهمية الجهاز. لو سيبنا المكان الفاضي من غير حافظ مسافة احنا بنفتح الباب على نفسنا لمشاكل هتعقد حياة الطفل السنية جداً بعدين:

• فقدان المسافة Loss of Space: السنة اللي ورا المكان الفاضي (غالباً بتكون اول ضرس دائم First permanent molar) هتتحرك لقدام Mesial drift والسنة اللي قدامه هتتحرك لورا Distal drift. النتيجة؟ المسافة اللي كانت مخصصة للسنة الدائمة هتتقفل خالص او جزء منها.

• انحشار السنة الدائمة Impaction: لما السنة الدائمة تيجي تطلع مش هتلاقي مكان كافي فهتفضل محشورة ومدفونة جوه عضم الفك او هتطلع في مكان غلط تماماً.

• ازاحة خط الوسط Midline Shift: لو الخلع كان لسنة امامية زي الناب Canine ممكن خط النص بتاع السنان كلها يتزحزح ناحية المكان الفاضي وده بيعمل مشكلة جمالية ووظيفية كبيرة.

• بزوغ مفرط للسنة المقابلة Supra-eruption: السنة اللي في الفك المقابل مش هتلاقي حاجة ترد عليها فهتبدأ تطلع زيادة عن مستواها الطبيعي وتعمل مشاكل في العضة Occlusion.

• تأخر بزوغ السنة الدائمة Delayed Eruption: ساعات لما السنان بتقفل على المكان الفاضي ده بيعمل زي عائق ميكانيكي بيمنع او يأخر طلوع السنة الدائمة.

• مشاكل في العضة: زي زيادة العضة العميقة Increased Overbite او تراجع السنان الامامية Retrusion in Anterior Segment.

الخلاصة ان تجاهل الموضوع ده معناه انك بتحكم على الطفل ده بنسبة كبيرة جداً انه هيدخل في قصة علاج تقويم معقد ومكلف في المستقبل.

ثالثاً: مواصفات الـ Space Maintainer الناجح

عشان الجهاز ده يشتغل صح ويادي وظيفته لازم يكون فيه كام مواصفة اساسية:

• يحافظ على ابعاد المسافة كاملة خصوصاً البعد الامامي الخلفي Mesio-distal dimension.

• يكون قوي كفاية عشان يستحمل قوة المضغ Masticatory forces.

• تصميمه يكون بسيط وسهل في التنضيف عشان ميجمعش اكل ويعمل تسوس او التهابات في اللثة.

• لازم ميعيقش حركة او نمو السنان اللي جنبه او طلوع السنة الدائمة.

• لازم ميمنعش النمو الطبيعي للفكين.

رابعاً: قبل ما تقرر… اسأل نفسك الاسئلة دي

قرار تركيب Space Maintainer مش قرار عشوائي. فيه عوامل كتير لازم تقيمها الاول عشان تعرف اذا كانت الحالة دي محتاجة جهاز اصلاً ولو محتاجة ايه انسب نوع ليها.

• الوقت اللي فات من وقت الخلع Time Elapsed Since Loss: هل الحالة لسه جاية والخلع حاصل قريب؟ ولا بقاله فترة طويلة؟ لو فات اكتر من 6 شهور غالباً هتكون نسبة كبيرة من المسافة اتقفلت وساعتها مش هينفع Space Maintainer عادي وهنحتاج جهاز لاستعادة المسافة Space Regainer.

• السن السني للمريض Dental Age of the Patient: الطفل ده في انهي مرحلة؟ هل لسه في مرحلة السنان اللبنية بس Primary dentition؟ ولا دخل في مرحلة التسنين المختلط Mixed dentition؟ ده بيفرق في اختيار نوع الجهاز والسنان اللي هنركب عليها.

• كمية العضم اللي مغطية السنة الدائمة Amount of Bone Covering the Unerupted Tooth: دي اهم معلومة بتقولك السنة الدائمة قربت تطلع ولا لسه بدري عليها وبنشوفها من الاشعة. فيه قاعدة عامة بتقول ان كل 1 مم من العضم فوق السنة بيحتاج حوالي من 4 لـ 6 شهور عشان يتآكل والسنة تطلع. لو لقيت في الاشعة ان السنة الدائمة متكون حوالي تلتين الجذر بتاعها Root formation is 2/3rds وفوقها طبقة عضم بسيطة ممكن تكون قربت تطلع ومش محتاجة جهاز. لكن لو لسه بدري عليها يبقى الجهاز ضروري.

• ترتيب بزوغ السنان Sequence of Eruption of Teeth: هل ترتيب طلوع السنان عند الطفل ده طبيعي؟ ساعات بيكون فيه اختلافات فردية ممكن تأثر على قرارك.

خامساً: انواع الـ Space Maintainers (الترسانة اللي في ايدك)

فيه عيلتين كبار من الاجهزة دي: ثابتة Fixed (بتتلزق ومبتتشالش) ومتحركة Removable (الطفل بيشيلها ويلبسها).

اشهر انواع الاجهزة الثابتة Fixed Space Maintainers واستخداماتها:

• Band and Loop: ده اشهر وابسط نوع. جهاز من ناحية واحدة Unilateral. بنركب حزام Band على الضرس اللي ورا المكان الفاضي وبيطلع منه سلك Loop يوصل لحد السنة اللي قدام المكان الفاضي عشان يسندها.

  • امتى نستخدمه؟ لما نكون خلعنا ضرس لبني واحد في ناحية واحدة من الفك (مثلاً First primary molar).

• Crown and Loop: نفس فكرة الـ Band and Loop بالظبط لكن بدل ما نستخدم Band بنستخدم تاج معدني Stainless Steel Crown كدعامة Abutment.

  • امتى نستخدمه؟ ده اختيار ممتاز لو السنة اللي هنركب عليها الجهاز نفسها محتاجة حشو كبير او علاج عصب ومحتاجة تتغطى بتاج. بكده بنضرب عصفورين بحجر. هو اقوى من الـ Band and Loop لكن عيبه انه ممكن يقع لو اللزق بتاعه فك Cementation failure.

• Lingual Arch: ده جهاز بيستخدم لما نكون خلعنا سنان من الناحيتين Bilateral. عبارة عن Bands بتتركب على الـ First Permanent Molars (الـ 6’s) يمين وشمال ومتوصلين بسلك بيمشي على السطح الداخلي للسنان السفلية من ناحية اللسان.

  • امتى نستخدمه؟ لما نكون خلعنا اكتر من ضرس لبني في الفك السفلي. عيبه: مينفعش نستخدمه لو القواطع السفلية الدائمة لسه مطلعتش لأنه هيعوق طلوعها.

• Nance Palatal Arch: ده يعتبر الاخ التوأم للـ Lingual Arch بس في الفك العلوي. برضه Bands على الـ 6’s فوق يمين وشمال ومتوصلين بسلك ماشي على سقف الحلق Palate.

  • ايه اللي بيميزه؟ فيه حتة اكريل صغيرة Acrylic Button في نص السلك بتستند على سقف الحلق عشان تدي دعم اضافي.

  • امتى نستخدمه؟ لما نكون خلعنا اكتر من ضرس لبني في الفك العلوي.

• Distal Shoe: ده جهاز ليه استخدام خاص ومهم جداً.

  • امتى نستخدمه؟ في حالة واحدة بس: لما نكون خلعنا الضرس اللبني الثاني Second Primary Molar (الـ E) والضرس الدائم الاول First Permanent Molar (الـ 6) لسه مطلعش. الجهاز ده بيكون ليه جزء معدني بينزل جوه اللثة والعضم عشان “يحجز” مكان للـ 6 وهو طالع ويوجهه لمكانه الصح. ده الجهاز الوحيد اللي بيشتغل تحت اللثة.

امتى نلجأ للاجهزة المتحركة Removable Space Maintainers؟

الجهاز المتحرك بيكون شبه طقم سنان جزئي صغير الطفل بيلبسه ويقلعه.

• لما يكون الجانب الجمالي مهم (مثلاً لو خلعنا سنان امامية والطفل مكسوف من شكله).

• لما نكون خلعنا سنان لبنية كتير جداً Bilateral multiple tooth loss والجهاز الثابت مش هينفع.

• لما يكون صعب نركب Bands على السنان الداعمة (مثلاً لو لسه طالعة جزئياً).

• عيبه: نجاحه بيعتمد 100% على التزام الطفل والاهل بلبسه. لو متلبسش يبقى كأننا معملناش حاجة.

الخلاصة: ازاي تختار الجهاز الصح؟ (A Simple Decision Tree)

الموضوع ممكن يبان معقد لكن خلينا نبسطه:

• خلعت First Deciduous Molar (الـ D)؟

  • ناحية واحدة بس؟ استخدم Band and Loop او Crown and Loop.

  • ناحيتين؟ استخدم Lingual Arch (تحت) او Nance Arch (فوق).

• خلعت Second Deciduous Molar (الـ E)؟

  • شوف الاول حالة الـ First Permanent Molar (الـ 6):

    • لو الـ 6 طلع خلاص في مكانه؟ عامل الـ E زي الـ D بالظبط (Band/Crown and Loop او Lingual/Nance).

    • لو الـ 6 لسه مطلعش؟ معندكش اختيار غير Distal Shoe.

• خلعت Canine (الـ C)؟

  • الموضوع هنا اعقد شوية وغالباً هتحتاج جهاز متحرك زي Removable Partial Denture.

• خلعت Incisors قدام؟

  • القرار هنا بيعتمد على عمر الطفل والجانب الجمالي والنفسي. لو لازم تعوضهم هتستخدم جهاز متحرك.

باختصار يا دكتور الـ Space Maintainer مش رفاهية ده جزء اساسي ومهم جداً من طب اسنان الاطفال الوقائي. فهمك للانواع المختلفة وامتى تستخدم كل نوع هيخليك تقدر تقدم لمريضك خطة علاج متكاملة تحميه من مشاكل كتير في المستقبل.