أبيكس السن اتكسرت أثناء الخلع؟ اعرف إمتى تشيلها وامتى تسيبها!

فيه لحظات كده في عيادة السنان بتفضل محفورة في الذاكرة. واحدة من اشهر اللحظات دي هي وانت بتخلع ضرس وماشي زي الفل وفجأة تسمع صوت “طقة” خفيفة وتلاقي نص الضرس طلع في ايدك والنص التاني لسه جوه. اللحظة دي بيعدي فيها شريط حياتك كله قدام عينك وبيجي في بالك سؤال واحد بس “اطلعها ولا اسيبها؟”.

الاجابة المباشرة ان القرار ده علم وخبرة وتقييم دقيق للحالة مش شجاعة او جبن. فيه حالات لازم تشيل فيها الابيكس المكسورة وحالات تانية بيكون الاسلم انك تسيبها. المقال ده هو الدليل بتاعك عشان تعرف تاخد القرار الصح.

قبل ما تاخد القرار: الـ Checklist الذهبي بتاعك

قبل ما تمسك اي الة وتبدأ تحاول تطلع الجزء المكسور خد نفس عميق وراجع الخمس نقط دول في دماغك. اجاباتك هي اللي هتحدد خطة العمل بتاعتك.

١. طول الجزء المكسور اد ايه؟ (The Size of the Fragment)

مش كل كسر زي التاني. الحجم هنا بيفرق جداً.

القاعدة بتقول لو الجزء المكسور صغير في حدود 3 الى 4 ملليمتر او اقل يعني في الثلث الاخير من الجذر Apical Third فده بيخلي قرار انك تسيبه اسهل واكتر اماناً. الاجزاء الصغيرة دي الجسم غالباً بيتعامل معاها كويس جداً ومبتعملش مشاكل. لكن لو الجزء المكسور اكبر من كده فاحتمالية انه يعمل مشاكل بتزيد والافضل انك تشيله.

٢. اتكسرت امتى بالظبط؟ (The Timing of the Fracture)

النقطة دي ذكية جداً وبتديك فكرة عن حالة الابيكس نفسها.

السيناريو الاول: لو الضرس كان خلاص “بيتهز” معاك وبقى Loose جداً وفجأة الابيكس اتكسرت في اخر لحظة. ده معناه ان الابيكس نفسها غالباً هتكون Loose زيه ولازم تشيلها لانها هتطلع بسهولة غالباً ومش هتعمل مشاكل.

السيناريو التاني: لو الكسر حصل من اول حركة ليك بالـ Elevator او الـ Forceps والضرس كان لسه ماسك نفسه. ده معناه ان الابيكس نفسها لسه ماسكة كويس جداً في العضم وهنا قرار انك تسيبها بيكون منطقي اكتر عشان متدخلش في معركة صعبة معاها.

٣. مكان الابيكس فين؟ (The Anatomical Location)

لازم تكون عارف كويس ايه هي “المناطق الخطرة” اللي حوالين السن اللي بتخلعه.

القاعدة هي لو الابيكس المكسورة قريبة جداً من مكان تشريحي خطير Anatomical Landmark زي الجيوب الانفية Maxillary Sinus او قناة العصب الفكي السفلي Inferior Alveolar Canal فالافضل انك تسيبها. محاولتك انك تطلعها ممكن بمنتهى السهولة تزقها جوه الـ Sinus او تعمل اصابة دائمة للعصب.

حالة خاصة: لو الجذر نفسه معووج Dilacerated Root والابيكس المكسورة بتاعته لافة وقريبة من جذر سنة سليمة جنبها فالافضل برضه انك تسيبها لان محاولتك انك تطلعها ممكن تأذي السنة السليمة دي.

٤. انت بتخلع الضرس ده ليه اصلاً؟ (The Reason for Extraction)

سبب الخلع نفسه بيفرق جداً في القرار.

لو بتخلع عشان التقويم Orthodontics: هنا مفيش اختيار. لازم تشيلها. دكتور التقويم محتاج مكان نضيف تماماً عشان يحرك فيه الاسنان واي جزء متبقي ممكن يعيق الحركة او يعمل مشاكل بعدين.

لو بتخلع عشان فيه خراج او التهاب Periapical Lesion or Infection: برضه لازم تشيلها. الابيكس في الحالة دي هي نفسها مصدر العدوى ولو سبتها كأنك معملتش حاجة والالتهاب هيرجع تاني.

٥. صحة المريض العامة ايه؟ (The Patient’s Medical Status)

صحة المريض ممكن تكون هي العامل الحاسم اللي بيخليك تاخد القرار النهائي.

لو المريض صحته كويسة وميقدرش يرفض تدخل جراحي بسيط لو احتجت فقرار انك تشيلها بيكون اسهل. لو المريض صحته ضعيفة او كبير في السن او حالته الطبية متسمحش بتدخل جراحي طويل Surgical Extraction فالافضل انك تسيبها وتتجنب اي مخاطرة.

حالة خاصة جداً ومهمة: لو المريض عنده امراض قلب خطيرة زي امراض القلب الروماتيزمية او الخلقية Rheumatic or Congenital Heart Disease او مركب صمامات صناعية او مناعته ضعيفة جداً هنا الموقف بيكون حساس. ترك اي جزء ممكن يكون مصدر للعدوى يعتبر خطر عليه لخطر الـ Infective Endocarditis. في الحالة دي لازم تشيلها بس بمنتهى الحرص والدقة ولو مش واثق من قدرتك 100% فالتحويل لجراح هو القرار الاسلم.

الخلاصة: امتى تقدر تسيب الابيكس وانت مطمن؟

بعد ما جاوبت على الاسئلة اللي فاتت تقدر تاخد قرار انك تسيب الابيكس المكسورة لو الشروط دي متحققة:

• الجزء المكسور صغير جداً مش اكتر من 4 مم.

• السن نفسه مكانش فيه التهاب او خراج يعني الابيكس نفسها مش مصدر عدوى.

• الجزء المكسور عميق جوه العضم مش سطحي عشان ميظهرش بعدين لما العضم يدوب شوية.

• صحة المريض متسمحش بتدخل جراحي معقد.

• الجزء المكسور قريب من تركيبات تشريحية خطيرة.

اهم نصيحة: قبل ما تقرر تشيل الابيكس خليك صريح مع نفسك. هل عندك الخبرة الكافية والادوات المناسبة؟ لو مش واثق من نفسك 100% فالقرار الاكثر احترافيةً واماناً للمريض هو انك تحول الحالة لاخصائي جراحة الفم والوجه والفكين Oral and Maxillofacial Surgeon.

قررت تشيلها؟ دليلك العملي لازالة الابيكس المكسورة بأمان (The Removal Toolkit)

لو بعد تقييمك لقيت ان الابيكس لازم تتشال فيه طريقتين اساسيتين: الطرق المغلقة من غير ما تفتح Flap والطرق المفتوحة بجراحة.

اولاً: الطرق المغلقة (Closed Approach)

الطرق دي بنجربها الاول لو الابيكس كانت Loose او متوقع انها تطلع بسهولة.

باستخدام الفايلات Endodontic Files:
نشف مكان السن كويس جداً بالقطن لحد ما تشوف فتحة قناة الجذر Root Canal. هات فايل K-file او H-file مقاسه مناسب يقدر يدخل بسهولة في القناة. ادخل بالفايل جوه القناة ولفه لفة او لفتين في اتجاه عقارب الساعة عشان “يعشق” في جدران القناة. امسك جسم الفايل نفسه بالـ Needle Holder واسحب لفوق بحركة واحدة. غالباً الابيكس هتطلع معاك.

باستخدام رافعة قمة الجذر (Root Tip Pick Elevator):
دي الة اساسية لازم تكون عندك. اختار واحدة يكون طرفها رفيع جداً ومدبب Pointed and Thin Tip. نشف المكان كويس وشوف الفراغ اللي بين الابيكس والعضم. ادخل بالـ Elevator في الفراغ ده Periodontal Ligament Space بحركة زي الوتد Wedging Movement.

تحذير: اوعى تستخدم الطريقة دي في الجذر الحنكي Palatal Root للاسنان العلوية الخلفية. انت كده بتزق الابيكس مباشرةً على الـ Sinus.

باستخدام الشفاط الجراحي (High Suction):
لو الابيكس صغيرة و Loose جداً وبتتحرك ممكن تستخدم شفاط جراحي High Suction طرفه رفيع جداً عشان “تشقطها” من مكانها.

ثانياً: الطرق المفتوحة (Open Approach)

لو جربت كل الطرق اللي فاتت وفشلت او لو من الاول واضح ان الابيكس ماسكة جامد فمفيش مفر من الجراحة. ده معناه انك هتحتاج ترفع شريحة لثوية Surgical Flap وتشيل جزء بسيط من العضم اللي مغطي الابيكس عشان تكشفها وتقدر تطلعها بسهولة.

ثلاث حاجات مستحيل تنجح من غيرها:

• اضاءة ممتازة Excellent Light.

• شفاط جيد Good Suction.

• مساعد شاطر وفاهم Clever Assistant.

في النهاية يا دكتور الموقف ده اختبار حقيقي لحكمتك وخبرتك. القرار الصح هو اللي بيحط امان وسلامة المريض في المقام الاول حتى لو كان القرار ده هو انك تعترف ان الحالة اكبر منك وتحولها لزميلك الجراح.