كتير اوي يا دكتور يجيلك طفل العيادة مع اهله، والام تقوله وريني سنانك يا حبيبي، وتيجي تقولك: بص يا دكتور السنة اللي قدام دي، كبيرة اوي وشكلها مقسوم نصين، هي دي سنة واحدة ولا اتنين لازقين في بعض؟
السيناريو ده بنشوفه كتير، والمنظر ده بالذات ليه تشخيصين اساسيين بيتلخبط فيهم دكاترة كتير. النهارده هنتكلم عن واحد منهم وهو الـ Gemination.
ايه هو الـ Gemination التوأمة السنية؟
ببساطة شديدة يا دكتور، دي عبارة عن محاولة فاشلة من برعم سنة واحدة single developing tooth germ انه ينقسم لاتنين، والنتيجة بتكون سنة واحدة حجمها كبير بشكل مش طبيعي. الحالة دي ليها اسم تاني وهو twinning.
شكله ايه في الاشعة؟ Radiographic Features
عشان الصورة تبقى واضحة في دماغك، خلينا نشوف مواصفاته في الاشعة:
مكانه Location
ممكن تحصل في اي مكان، بس هي منتشرة اكتر في الاسنان الامامية اللبنية primary anterior teeth سواء في الفك العلوي maxilla او السفلي mandible.
الحدود بتاعته Edge
حدود السنة دي بتكون واضحة جداً well-defined زيها زي اي سنة طبيعية.
شكله Shape
شكلها بيبان كسنة كبيرة large tooth، وغالباً التاج بتاعها بيكون فيه زي شق او حتة مقسومة notched crown.
التكوين الداخلي Internal structure
من جوه تركيبها طبيعي جداً. الاجزاء الصلبة زي الـ enamel المينا والـ dentin العاج بتبان radiopaque معتمة للاشعة. اما الـ pulp chamber غرفة العصب والـ root canal space قناة الجذر بيبانوا radiolucent شفافين للاشعة.
العدد Number
ممكن تكون حالة فردية بتحصل في سنة واحدة single او تحصل في اكتر من سنة multiple.
اهم نقطتين في التشخيص Key points
ركز معايا في النقطتين دول عشان هما اللي فيهم الخلاصة:
-
لما تعد الاسنان في الفك اللي فيه الحالة دي، هتلاقي العدد طبيعي جداً (16 سنة في الفك الكامل). ودي اهم علامة تشخيصية.
-
في الغالب السنة دي بتبان كسنة واحدة مقسومة جزئياً وليها جذر واحد وقناة عصبية واحدة single root and root canal.
الحالة دي بتحصل اكتر في الاسنان اللبنية primary dentition بس ده ميمنعش انها ممكن تحصل في الاسنان الدايمة permanent teeth.
ايه اهميته الاكلينيكية؟ Clinical significance
طيب الحالة دي ممكن تسبب مشاكل؟ اه طبعاً:
-
اول حاجة هي الشكل الجمالي aesthetic concerns.
-
ممكن تسبب ازدحام في الاسنان crowding او مشاكل في العضة malocclusion.
-
الشقوق العميقة اللي في التاج بتزود احتمالية التسوس caries risk.
-
لو السنة دي احتاجت علاج عصب في المستقبل، شكلها المعقد ده ممكن يصعب المهمة complicate endodontic treatment.
ازاي تفرقها عن الـ Fusion الالتحام؟
دي اهم نقطة في الموضوع كله يا دكتور. لازم نفرق بين الـ gemination وحالة تانية شبهها جداً اسمها الـ fusion. الفيصل كله في عد الاسنان:
-
في الـ Gemination التوأمة السنية: عدد الاسنان في الفك بيفضل طبيعي.
-
في الـ Fusion الالتحام: هتلاقي فيه سنة ناقصة عن العدد الطبيعي في الفك.
بمجرد ما تعد الاسنان، التشخيص بيبقى واضح ومفيهوش اي لخبطة.
