خراج ولا التهاب منتشر؟ امتى تكتب مضاد حيوي، وايه النوع اللي تختاره صح!

فيه سيناريو كده كلنا كدكاترة سنان حافظينه صمّ. عيان داخل عليك العيادة وشه قد كده، مش عارف يفتح بقه، وبيصوت من الوجع. اول حاجة بتيجي في بالك طبعاً ان الحالة دي لازم تبدأ معاها مضاد حيوي Antibiotic فوراً. بس السؤال الأهم هو: اي مضاد حيوي؟ وليه؟ وهل كل ورم زي التاني؟

وصف المضاد الحيوي ده مش مجرد كتابة اسم دوا في روشتة وخلاص. ده قرار علاجي دقيق بيعتمد على فهمك لنوع العدوى اللي قدامك، ونوع البكتيريا، وحالة العيان نفسه. لو وصفت الدوا الغلط انت مش بس معالجتش المشكلة، انت ممكن تزودها وتعمل مصايب زي مقاومة البكتيريا للمضادات الحيوية Antibiotic resistance.

في المقالة دي، هنفصص الموضوع ده حتة حتة. هنعرف الفرق بين التهاب النسيج الخلوي Cellulitis والخراج Abscess، وهنعرف ازاي نختار المضاد الحيوي الصح، وهنجاوب على السؤال الأزلي: “يا دكتور، اخده كام يوم؟”.

أولاً: التشخيص الصح… الفرق بين الـ Cellulitis والـ Abscess

قبل ما تفكر في اسم المضاد الحيوي، لازم تحدد انت بتحارب مين. هل انت بتحارب جيش منتشر ومالوش حدود واضحة، ولا بتحارب تجمع محصن في مكان معين؟

• التهاب النسيج الخلوي Cellulitis:

  • تخيله كـ “جيش منتشر”. دي عدوى بكتيرية حادة وسايحة في الأنسجة. الورم بيكون صلب Diffuse and hard، بيوجع جداً مع اللمس، ومالوش حدود واضحة. الجلد فوقه بيكون احمر وسخن. في المرحلة دي، مفيش صديد متجمع نقدر نفتحه.

• الخراج Abscess:

  • تخيله كـ “حصن متجمع”. هنا الجسم قدر يحاصر العدوى ويجمع الصديد Pus في مكان واحد. الورم بيكون متحدد اكتر Localized، وبتحس بنقطة طرية في النص Fluctuant، وده معناه ان الصديد جاهز يتفتح ويتصرف.

التفرقة دي مهمة جداً لأنها بتحدد خطة العلاج ونوع البكتيريا اللي بنحاربها.

ثانياً: اعرف عدوك… مين هي البكتيريا اللي في الليلة دي؟

عدوى الأسنان Odontogenic infections غالباً بتكون عدوى مختلطة Mixed infection، يعني كوكتيل من انواع بكتيريا مختلفة. بنقسمهم لنوعين كبار:

1. بكتيريا هوائية Aerobic Bacteria: دي اللي بتحب الاكسجين وبتبقى موجودة في اول مراحل العدوى. اشهرها عيلة الـ Streptococci.

2. بكتيريا لا هوائية Anaerobic Bacteria: دي اللي بتكره الاكسجين وبتظهر لما العدوى بتبقى مزمنة، زي في حالات الخراج المقفول. اشهرها عائلات الـ Prevotella و Porphyromonas و Fusobacterium.

في مرحلة الـ Cellulitis، بتكون البكتيريا الهوائية Aerobic هي اللي مسيطرة. لكن مع الوقت، ومع تكون الـ Abscess، بتبدأ البكتيريا اللاهوائية Anaerobic تظهر وتبقى هي البطل بتاع المشكلة (1).

ثالثاً: اختيار السلاح الصح… روشتة المضاد الحيوي

دلوقتي بعد ما شخصنا الحالة وعرفنا مين اللي بنحاربه، نقدر نختار السلاح الصح.

سيناريو رقم 1: حالة التهاب منتشر Cellulitis او خراج Abscess مقفول

هنا العدوى مختلطة والنوعين شغالين. يبقى لازم نستخدم مضاد حيوي يغطي الاتنين Broad-spectrum coverage.

• الاختيار الأول (المزيج الفعال): Penicillin + Metronidazole

  • البنسلين Penicillin زي الأموكسيسيلين Amoxicillin: ده استاذ في التعامل مع البكتيريا الهوائية Aerobic bacteria.

  • الميترونيدازول Metronidazole زي الفلاجيل Flagyl: ده ملك البكتيريا اللاهوائية Anaerobic bacteria.

  • لما بتجمع الاتنين دول مع بعض، انت كده عملت تغطية شبه مثالية لأغلب انواع البكتيريا اللي بتعمل عدوى الأسنان (2).

• الاختيار الثاني (سلاح واحد بيخلص): Clindamycin

  • الكليندامايسين Clindamycin زي الدالاسين سي Dalacin C: ميزة الدوا ده انه لوحده بيعرف يشتغل على جزء كبير من البكتيريا الهوائية واللاهوائية. بنستخدمه كخيار اول لو العيان عنده حساسية من البنسلين Penicillin allergy، او كخيار تاني لو المزيج الأول مش شغال كويس.

سيناريو رقم 2: حالة خراج Abscess وهتخلع السن في نفس الجلسة

هنا الحكاية بتختلف شوية. لو انت هتعمل تصريف للصديد Incision and drainage وهتخلع السن المصدر، انت كده عملت اهم خطوة في العلاج.

ايه اللي بيحصل لما بنخلع؟ بمجرد ما بتفتح الخراج وتخلع، انت بتعرض البكتيريا اللاهوائية Anaerobic اللي بتكره الاكسجين لكمية اكسجين كبيرة. النتيجة؟ اغلبها بيموت.

يبقى محتاجين نغطي مين؟ بنبقى محتاجين نركز اكتر على البكتيريا الهوائية Aerobic اللي لسه عايشة.

• الاختيار الممكن: ممكن في الحالة دي نكتفي بمضاد حيوي بيغطي البكتيريا الهوائية بشكل أساسي، زي الأموكسيسيلين Amoxicillin لوحده.

ملحوظة مهمة جداً: لو العيان اللي قدامك مناعته ضعيفة Immunocompromised زي مريض سكر مش متظبط او بياخد أدوية مثبطة للمناعة، القاعدة دي متتطبقش. في الحالة دي، خليك دايماً في الأمان واستخدم مزيج المضادات الحيوية Combination therapy حتى لو هتخلع، عشان تضمن انك قضيت على العدوى تماماً (3).

رابعاً: “اخده كام يوم يا دكتور؟” – حرب الـ ٧ أيام

ده السؤال اللي بنتسأله كل يوم. والإجابة لازم تكون واضحة ليك وللعيان.

كتير من العيانين بيحسوا بتحسن بعد يومين تلاتة، فيقرر من نفسه انه “خف” ويوقف الدوا. ودي اكبر كارثة ممكن تحصل، لأنها السبب الرئيسي في ظهور وحش مقاومة البكتيريا للمضادات الحيوية Antibiotic Resistance.

اشرح للعيان الموضوع كأنه معركة: لما بتبدأ كورس المضاد الحيوي، انت بتبدأ حرب على البكتيريا. بعد يومين، انت قتلت “الجنود العادية” الضعيفة عشان كده الأعراض بتتحسن. لكن لسه فيه “جنود خارقة” مصابة وقوية مستخبية. لو وقفت الدوا بدري، انت بتدي للجنود الخارقة دي فرصة انها ترجع تاني وتتكاثر والمرة دي هتكون عارفة السلاح بتاعك.

مدة العلاج المثالية: في اغلب حالات عدوى الأسنان الحادة، المدة المثالية هي ٧ أيام كاملة (4). لازم العيان يكمل الكورس كله حتى لو حس انه بقى كويس تماماً.

تحذير من الجرعة الزيادة: في نفس الوقت، لازم تفهم العيان ان الجرعة الزيادة او استخدام المضاد الحيوي عمال على بطال بيقلل المناعة وبيقتل البكتيريا النافعة في الجسم. لازم ياخد الجرعة الموصوفة بالظبط للمدة الموصوفة بالظبط.

دورنا كدكاترة مش بس نكتب الروشتة، دورنا الأهم اننا نعلم ونوعي العيان بأهمية انه يلتزم بيها ونشرحله ببساطة “ليه” بنطلب منه ده.