أسرار نجاح حشوات الكمبوزيت: من اختيار النوع لـ Bonding صحيح!

شغل “الكومبوزيت” Composite Restorations يعتبر هو العمود الفقري لأي عيادة أسنان النهاردة. مع انه بيبان سهل، لكن الحقيقة إن كل خطوة فيه، من أول اختيار نوع الكومبوزيت لحد آخر ثانية في الـ Curing، ليها أسرار وتكات بتفرق بين حشوة تعيش شهور وحشوة تانية تعيش سنين طويلة.
في المقالة دي، هنمسك الموضوع من أوله لآخره. هنفكك شفرة أنواع الكومبوزيت المختلفة، وهنعرف إزاي نشيل التسوس صح من غير ما نضر السنة، وهنتكلم عن أهم التكات في تصميم الكافيتي والـ Bonding عشان توصل لشغل احترافي بجد.

أولاً: فك شفرة أنواع الكومبوزيت (Composite Types Unlocked)

مش كل علب الكومبوزيت اللي على الرف عندك زي بعضها. كل نوع ليه تركيبة مختلفة بتخليه مناسب لشغل معين ومش مناسب لشغل تاني. التقسيمة الأساسية بتعتمد على حجم جزيئات الحشو (Filler particles):

• ماكرو Macrofilled: ده النوع القديم. جزيئاته كبيرة، وده بيخليه قوي جداً High Strength، لكن سطحه خشن وشكله مش حلو Bad Esthetic، وبيصعب تلميعه. استخدامه قل جداً دلوقتي.

• مايكرو Microfilled: جزيئاته صغيرة جداً، وده بيخليه قابل للتلميع بشكل ممتاز Better Esthetic وشكله حلو. لكن وجود جزيئات صغيرة بيخليه أضعف Less Strength ومبيستحملش ضغط المضغ في الأسنان الخلفية.

• هجين Hybrid: ده كان محاولة لدمج النوعين اللي فاتوا. جابوا جزيئات كبيرة وصغيرة مع بعض. النتيجة كانت قوة وشكل مقبولين Medium Strength and Esthetic، لكنه مكانش مثالي.

• مايكرو هجين Microhybrid: تطوير للنوع اللي قبله. صغروا حجم الجزيئات الكبيرة شوية، فبقى أقوى وشكله أحسن Better Strength and Esthetic. ده كان النوع المسيطر على السوق لسنين طويلة.

• نانو Nanofilled: هنا دخلنا عصر تكنولوجيا النانو. الجزيئات بقت صغيرة جداً في حجم النانو، وده خلاه قابل للتلميع بشكل خرافي Best Esthetic وفي نفس الوقت قوي بشكل كويس Good Strength.

• نانو هجين Nanohybrid: ده يعتبر “وحش” الكومبوزيت حالياً. هو خليط من جزيئات النانو مع مجموعات أكبر شوية (Clusters)، وده بيديله أقوى صلابة ممكنة Best Strength مع شكل جمالي ممتاز Good Esthetic.

الزتونة: اختار النوع الصح للشغلانة الصح:

• للأسنان الأمامية Anterior Teeth: محتاج شكل جمالي وتلميع خرافي. يبقى اختيارك المثالي هو النانو Nanofilled.

• للأسنان الخلفية Posterior Teeth: محتاج قوة وصلابة تستحمل طحن الأكل. يبقى اختيارك المثالي هو النانو هجين Nanohybrid.

ثانياً: إزاي تعرف التسوس وتشيله صح؟ (Precise Caries Identification)

أكبر غلطة ممكن تعملها هي إنك تشيل نسيج سليم من السنة، او تسيب جزء مصاب تحت الحشوة. طب إزاي تفرق بين العاج اللي لازم يتشال والعاج اللي لازم تسيبه؟

• العاج المصاب Infected Dentin: ده الجزء الخارجي من التسوس، بيكون طري جداً ومليان بكتيريا، ومستحيل يرجع يصلح نفسه. ده لازم يتشال بالكامل.

• العاج المتأثر Affected Dentin: ده الجزء الداخلي، بيكون لونه أغمق شوية لكنه لسه صلب، فيه بكتيريا قليلة جداً، والـ Collagen fibers بتاعته سليمة، وممكن يرجع يصلح نفسه (Remineralization). ده لازم تسيبه.

طب افرق بينهم إزاي في العيادة؟

• صبغات تحديد التسوس Caries Detector Dyes:

  • دي صبغة بتحطها في الكافيتي، بتلون العاج المصاب Infected Dentin بلون واضح (غالباً أحمر او أزرق)، فبتشيله وانت مطمن. العاج المتأثر Affected Dentin مش بيتلون، فبتسيبه.

• الحفار اليدوي الحاد Sharp Excavator:

  • ده اختبار بسيط وعملي. العاج المصاب بيكون طري زي الجبنة، وبيطلع معاك بسهولة بالـ Excavator. لكن العاج المتأثر بيكون صلب، وهتحس بمقاومة وانت بتحاول تشيله.

ثالثاً: تصميم الكافيتي: شوية تكات هتفرق (Smart Cavity Design)

تصميم الكافيتي في الكومبوزيت مختلف عن الأملغم. هنا احنا بنحافظ على نسيج السنة قدر الإمكان، بس فيه كام قاعدة لازم تمشي عليها:

• دَوّر الحواف Wall Roundation: اعمل تقريب لكل الزوايا الداخلية للكافيتي. الكومبوزيت بيكره الزوايا الحادة، والتقريب ده بيقلل الإجهاد على الحشوة وبيخليها تعيش أكتر.

• شيل الـ Marginal Ridge لو ضعيف: في حشوات Class I، لو لقيت الـ Marginal ridge سُمكه أقل من 1.6 مم، شيله وحوله لـ Class II. لو سيبته، هيكسر مع أول لقمة ياكلها المريض.

• قيم الـ Cusps كويس:

  • لو سُمك الـ Cusp أقل من 2 مم في الـ Molars او 1.6 مم في الـ Premolars، شيله وعوضه بالكومبوزيت.

  • لو الكافيتي واسع (واخد أكتر من نص المسافة بين الـ Cusps) او عميق (أكتر من 4 مم)، اعمل تقليل لارتفاع الـ Cusps وتغطيتها بالكومبوزيت Cuspal Reduction and Coverage. ده هيحمي السنة من الكسر.

• حافظ على المينا المدعومة كويس: أي مينا تحتها عاج سليم (Supported Enamel)، سيبها. لكن أي مينا مش تحتها عاج (Undermined Enamel)، لازم تتشال، إلا في حالة واحدة بس:

  • الاستثناء: في حشوات Class III، ممكن تسيب المينا الشفافة من ناحية الـ Labial حتى لو مش تحتها عاج، عشان تحافظ على الشكل الجمالي الطبيعي اللي عمر الكومبوزيت ما هيعرف يقلده 100%.

• نعّم الحواف: بعد ما تخلص، استخدم Finishing Stone عشان تنعم كل حواف الكافيتي.

رابعاً: الـ Bonding… أهم خطوة في العملية كلها

كل اللي فات ده ممكن يضيع لو خطوة الـ Bonding متعمتلش صح. دي شوية أسرار عشان تضمن أقوى لزق ممكن:

• متعملش Etching زيادة للعاج: الـ Acid Etching على العاج Dentin لو زاد عن 15 ثانية، بيدمر ألياف الكولاجين Collagen Fibers اللي البوند بيمسك فيها، وده بيضعف اللزق.

• الحل الأذكى: Selective Etching: زي ما قلنا في المقالة اللي فاتت، اعمل Acid Etching للمينا Enamel بس، وبعدين استخدم Self-Etch Bond على العاج والمينا مع بعض. ده بيديك أحسن ما في العالمين (1).

• التفريش النشط Active Brushing: لما تحط الـ Bonding Agent، متدهنهوش وتسيبه. استخدم الـ Microbrush واعمل “تفريش” نشط للسطح لمدة 20 ثانية. ده بيساعد المادة إنها تتغلغل جوة الـ Dentinal tubules وتعمل لزق أقوى.

• نشّف البوند صح: بعد التفريش، نشف بالهوا Air Drying بلطف لحد ما تتأكد إن المادة بقت طبقة رقيقة وثابتة ومبتتحركش.

• الـ Curing المزدوج: متعملش Curing للبوند 20 ثانية مرة واحدة. اعمل Curing لمدة 20 ثانية، استنى ثانيتين، وبعدين اعمل Curing 20 ثانية كمان. الطريقة دي بتقلل الحرارة اللي بتوصل للعصب وبتحميه من الالتهاب Pulpitis.

• السلاح السري Chlorhexidine: قبل ما تحط البوند، حط Chlorhexidine 2% على قطنة في الكافيتي لمدة 30 ثانية ونشفها كويس. الكلورهيكسيدين بيعمل حاجتين مهمين جداً:

  • بيقتل أي بكتيريا متبقية.

  • الأهم، إنه بيوقف عمل إنزيمات معينة في العاج (MMPs) ممكن تكسر طبقة البوند على المدى الطويل (3).

لو التزمت بالخطوات دي، انت مش بس بتعمل حشوة شكلها حلو، انت بتعمل حشوة قوية، لازقة صح، وهتعيش مع المريض سنين طويلة.