مضاعفات البنج في العين: لما تخاف على المريض من البنج أكتر من الخلع نفسه!

فيه لحظات كدا في عيادة السنان بتخلي قلبك يدق اسرع من العادي. ولعل اكتر المواقف دي رعباً لما تدي حقنة بنج لمريض خصوصاً لو IANB او Maxillary block وفجأة تلاقي المريض بيبص لك بقلق وبيقول “دكتور انا شايف الدنيا بتتهز” او “انا شايف كل حاجة اتنين!”.

اللحظة دي كفيلة تخلي الف سيناريو وسيناريو وحش يعدي في خيالك. لكن الحقيقة ان مضاعفات البنج في العين Ocular complications of local anesthesia ورغم انها نادرة ومخيفة فعلاً الا ان فهمك العميق ليها بيخليك قادر تتعامل معاها بمنتهى الهدوء والحرفية وتطمن المريض ان الموضوع كله مؤقت وهيروح لحاله.

المقالة دي هتكون دليلك الشامل عشان تفهم بالتفصيل الممل ازاي شوية بنج في الفم ممكن يوصلوا للعين وايه الاعراض اللي ممكن تظهر على المريض والاهم من كل دا ازاي تتجنب السيناريو المرعب ده من اساسه.

بشكل مباشر وبسيط مضاعفات البنج في العين بتحصل لما محلول البنج بيوصل لمنطقة محجر العين عن طريق الخطأ سواء بالانتشار المباشر او عن طريق الاوعية الدموية وده بيسبب شلل مؤقت في العضلات والاعصاب المتحكمة في حركة العين. النتيجة بتكون مجموعة اعراض زي ازدواجية الرؤية وفقدان بصر مؤقت لكنها بتختفي تماماً بمجرد انتهاء مفعول البنج.

الاعراض: ايه اللي ممكن نشوفه على المريض؟ The Clinical Signs

لما البنج بيوصل للعين بيعمل شلل مؤقت للعضلات والاعصاب المسؤولة عن حركة العين والجفن وحدقة العين. والنتيجة بتكون مجموعة من الاعراض ممكن تحصل لوحدها او مجتمعة مع بعضها:

• ازدواجية الرؤية Diplopia وده اشهر عرض على الاطلاق. المريض فجأة بيشوف كل حاجة نسختين. وده بيحصل بسبب شلل مؤقت في واحدة من العضلات اللي بتحرك العين Extraocular muscles.

• الحَوَل Squint/Strabismus بتلاقي عين المريض فجأة “حولت” او اتحركت في اتجاه غريب ومش قادر يرجعها لمكانها الطبيعي.

• اتساع حدقة العين Mydriasis حدقة العين في الناحية اللي اديت فيها الحقنة بتوسع جداً ومبتستجبش للضوء.

• تدلّي الجفن Eyelid Ptosis جفن العين العلوي بيرتخي وبينزل لتحت والمريض مش بيقدر يفتحه بشكل كامل.

• زغللة الرؤية Blurred Vision الرؤية بتبقى مشوشة ومش واضحة.

• فقدان البصر المؤقت Temporary Blindness/Amaurosis وده اكتر عرض مرعب ممكن تشوفه. المريض بيفقد القدرة على الرؤية تماماً في العين المصابة لكن لحسن الحظ الموضوع بيكون مؤقت تماماً.

ازاي البنج بيوصل للعين؟ رحلة من الفم الى محجر العين The Pathways

طيب السؤال المنطقي هنا ازاي حقنة بنج انا بديها في الفك السفلي او العلوي ممكن تسافر كل المسافة دي وتوصل للعين؟ فيه كذا طريق ممكن البنج يسلكه سواء بشكل مباشر او غير مباشر.

أ. بشكل مباشر Direct:

• حقن مباشر في محجر العين Direct Injection into the Orbit
  ده خطأ تكنيكي ممكن يحصل خصوصاً مع الحقن العالي زي الـ Infraorbital Nerve Block. لو الابرة دخلت بعمق زيادة عن اللزوم ممكن تخترق الـ Orbit ويوصل البنج مباشرةً للعضلات والاعصاب اللي جوا.

• انتشار البنج لمحجر العين Diffusion of LA into the Orbit
  في حقنة تخدير العصب الفكي العلوي Maxillary Nerve Block (High tuberosity approach) لو دخلت بالابرة لفوق زيادة ممكن البنج ينتشر من الـ Pterygopalatine fossa ويدخل للـ Orbit من خلال شق اسمه الشق الحجاجي السفلي Inferior Orbital Fissure. والمفاجأة ان ده ممكن يحصل حتى مع حقنة العصب السنخي السفلي IANB. لو الابرة دخلت لفوق وعميق زيادة في الـ Infratempral Fossa ممكن البنج ينتشر لفوق ويوصل برضه للـ Inferior Orbital Fissure ويدخل منه للعين.

ب. بشكل غير مباشر Indirect (عن طريق الاوعية الدموية):

وده السيناريو الاكتر شيوعاً. المشكلة بتبدأ لما طرف الابرة يدخل جوه شريان او وريد بالغلط وانت تحقن البنج مباشرةً في مجرى الدم. عشان كدا دايماً بنقول ان السحب قبل الحقن Aspiration مش رفاهية ده خطوة اساسية لسلامة المريض.

لو حقنت البنج في وعاء دموي ممكن يوصل للعين بكذا طريق معقد:

• الطريق الشرياني (من شريان لشريان)
  بتحقن بالغلط في الشريان السنخي السفلي Inferior Alveolar Artery. البنج بيمشي عكس اتجاه الدم Retrograde flow ويوصل للشريان الفكي Maxillary Artery. ومنه للشريان السحائي الاوسط Middle Meningeal Artery. الشريان ده له فرع بيتصل بالشريان العيني Ophthalmic Artery اللي بيغذي كل حاجة جوه محجر العين. وبكدا البنج يوصل للعين ويعمل شلل للاعصاب.

• الطريق الوريدي (من وريد لوريد)
  بتحقن بالغلط في شبكة اوردة كثيفة موجودة في المنطقة دي اسمها الضفيرة الجناحية Pterygoid Venous Plexus. من الضفيرة دي فيه اوردة صغيرة اسمها Emissary Veins بتخترق العضم وتوصل بين الضفيرة اللي بره وبين الاوردة اللي جوه الجمجمة. البنج ممكن يمشي من خلال الاوردة دي ويدخل لمحجر العين Orbit او يوصل لمكان اخطر اسمه الجيب الكهفي Cavernous Sinus وهو تجمع وريدي كبير في قاعدة الجمجمة بتعدي من خلاله كل الاعصاب اللي بتتحكم في حركة العين. وصول البنج للمكان ده بيعمل شلل كامل لكل الاعصاب دي.

دي حالة نادرة جداً لكنها ممكن تحصل. ازاي المريض ياخد حقنة يمين وعينه الشمال هي اللي تتأثر؟ السبب بيكون حقن مباشر في وعاء دموي برضه وتحديداً في الضفيرة الجناحية الوريدية Pterygoid Plexus of Veins (4).

البنج بيدخل للضفيرة في ناحية الحقن. ومنها للجيب الكهفي Cavernous Sinus في نفس الناحية. الجيبين الكهفيين (اليمين والشمال) متصلين ببعض عن طريق اوردة اسمها الجيوب الوريدية بين الكهفين Intercavernous Sinuses. البنج بيعدي من خلال الاتصال ده ويوصل للجيب الكهفي في الناحية المقابلة. ومن هناك بيوصل لمحجر العين Orbit في الناحية المقابلة ويسبب الاعراض.

حصلت المشكلة… اعمل ايه؟ Management Protocol

لو حصلت معاك الحالة دي اهم حاجة تعملها انك تتمالك اعصابك تماماً. فزعك هيتنقل للمريض وهيزود المشكلة.

1. وقف الشغل فوراً Stop the Procedure اول خطوة هي انك توقف اي حاجة بتعملها.

2. طمّن المريض بهدوء وثقة Reassure the Patient
   “اطمن ده عرض جانبي مؤقت ومعروف بيحصل احياناً مع البنج. عينك هترجع طبيعية تماماً اول ما مفعول البنج يروح. مفيش اي داعي للقلق انا معاك خطوة بخطوة”. اشرح بهدوء وفهم المريض ان البنج وصل بالغلط لعضلات العين وخدرها زي ما بيخدر السنان وان الموضوع هياخد نفس وقت البنج العادي وهيروح.

3. احمي العين لو المريض مش قادر يقفل جفنه Eyelid Ptosis العين بتكون معرضة للجفاف. ممكن تحط عليها شاش مبلل بمحلول ملح او تطلب منه يغمضها بايده برفق لحد ما الاحساس يرجع.

4. متكملش شغل الافضل انك تأجل الشغل ليوم تاني. المريض نفسياً مش هيكون مستعد يكمل وانت كمان محتاج تتأكد ان كل حاجة رجعت طبيعية.

5. سجل كل حاجة اكتب في ملف المريض بالظبط ايه اللي حصل وايه الاعراض اللي ظهرت وازاي اتعاملت معاها.

6. المتابعة خد رقم تليفون المريض وكلمه بعد كام ساعة عشان تطمن ان الاعراض راحت. الخطوة دي بتفرق جداً في بناء الثقة.

تذكر دايماً المشكلة دي في كل الحالات تقريباً بتكون مؤقتة تماماً Temporary وبتختفي 100% مع زوال مفعول البنج.

الخلاصة: الوقاية هي الحل الامثل Prevention is the Best Cure

بدل ما تدخل في كل الدراما دي الاسهل انك تتجنبها من الاول. الوقاية بسيطة وتتلخص في قاعدتين ذهبيتين:

• اعرف تشريحك كويس ونفذ التكنيك بدقة Know Your Anatomy, Master Your Technique اعرف بالظبط انت داخل فين واتبع الخطوات الصحيحة لكل حقنة عشان تتجنب الدخول في اماكن خطرة.

• اسحب قبل ما تحقن… دايماً! Aspirate… Always!
  قبل ما تضغط على المكبس وتحقن البنج اسحب لورا سحبة بسيطة Aspiration. لو ظهر دم في الخرطوشة ده معناه انك جوه وعاء دموي. اوعى تحقن! اخرج بالابرة وغير الخرطوشة وادخل في مكان مختلف شوية. اعمل السحبة دي على مستويين او تلاتة وانت داخل بالابرة عشان تضمن الامان.

تخدير الاسنان اجراء آمن جداً لو اتعمل صح. خليك دايماً مركز احترم التشريح ومتستعجلش. بكده هتحمي مريضك من مضاعفات نادرة لكنها مخيفة وهتحافظ على سمعتك كدكتور شاطر وحريص.