Gummy Smile: إيه أسبابها و إزاي نعالجها؟

“نفسي اضحك من قلبي من غير ما اداري شفتي”… جملة بنسمعها كتير في عياداتنا. الابتسامة اللثوية او الـ Gummy Smile واللي معناها ان جزء كبير من اللثة بيبان وقت الضحك هي واحدة من اكتر المشاكل التجميلية اللي بتأثر على ثقة المريض بنفسه. والمريض ده لما بيجيلك هو مش جاي يشتكي من وجع هو جاي يدور على حل يغير شكل ابتسامته.

دورنا كدكاترة سنان هنا مش بس اننا نقترح حلول لأ الاهم هو اننا نعرف نشخص السبب الحقيقي ورا الـ Gummy Smile دي. لأن التشخيص الصح هو اللي هيودينا للخطة العلاجية الصح.

في المقالة دي هنمشي معاك خطوة بخطوة من اول تحديد السبب لحد عرض كل خيارات العلاج المتاحة عشان تقدر تقدم لمريضك احسن رعاية ممكنة.

أولاً: تفكيك اللغز… ايه هي أسباب الـ Gummy Smile؟

الابتسامة اللثوية مش سببها حاجة واحدة دي ممكن تكون نتيجة لواحد او اكتر من العوامل دي متجمعة. التشخيص الصح بيبدأ من هنا:

١. تاج السن قصير Short Clinical Crown

ده يمكن اشهر سبب بنشوفه. ببساطة الجزء اللي باين من السنة بيكون قصير وجزء كبير من المينا Enamel بيكون لسه متغطي باللثة. الحالة دي ليها اسمين تانيين:

• تأخر البزوغ السلبي Altered Passive Eruption: يعني بعد ما السنة طلعت اللثة والعضم متراجعوش لمكانهم الصحيح وفضلوا مغطيين جزء من التاج.

• التآكل نتيجة الجز على الأسنان Attrition due to Bruxism: المريض اللي بيجز على سنانه كتير بيحصل تآكل في اطراف الأسنان فبتقصر. وكرد فعل من الجسم بيحصل بزوغ زيادة للسن والعضم عشان يعوض الجزء اللي اتآكل وده بيسحب اللثة معاه.

٢. حركة الشفة العلوية زيادة عن اللزوم Upper Lip Hypermobility

هنا طول السنة واللثة طبيعي لكن المشكلة في عضلات الشفة نفسها. الشفة العلوية بتترفع لمسافة اكبر من الطبيعي وقت الضحك فبتكشف جزء كبير من اللثة. تخيلها زي ستارة بتترفع زيادة عن اللزوم.

٣. الشفة العلوية قصيرة Short Upper Lip

في الحالة دي المشكلة في طول الشفة نفسها وهي مرتاحة. الشفة بتكون قصيرة تشريحياً فحتى مع حركة طبيعية وقت الضحك هي مش بتقدر تغطي اللثة بشكل كافي.

٤. نمو الفك العلوي راسي زيادة Vertical Maxillary Excess

هنا المشكلة في العضم نفسه. الفك العلوي Maxilla بيكون اطول من الطبيعي في البعد الراسي. ده بيخلي اللثة والأسنان كلها في مستوى منخفض وبالتالي بيبان جزء كبير من اللثة. المرضى دول غالباً بيكون عندهم شكل وجه مميز اسمه Long Face Syndrome.

٥. كوكتيل اسباب Combination of Factors

في كتير من الحالات المشكلة مش بتكون سبب واحد بس. ممكن تلاقي مريض عنده قصر في تاج السن وفي نفس الوقت حركة زيادة في الشفة. عشان كده الفحص الدقيق لكل العوامل دي مهم جداً.

ثانياً: ازاي تشخص السبب زي المحترفين؟ A Step-by-Step Diagnostic Protocol

التشخيص مش بالنظر بس. فيه قياسات بسيطة ودقيقة هتخليك تحدد السبب بسهولة:

١. تقييم طول تاج السن

• الفحص الاكلينيكي: هل شكل الأسنان مربع وقصير؟ هل حواف اللثة Gingival margins على مستويات مختلفة؟

• استخدام الـ Periodontal Probe: بعد بنج موضعي بسيط تقدر تدخل بالـ Probe في الـ Sulcus وتتحسس مكان الـ Cementoenamel Junction CEJ. لو لقيت ان الـ CEJ تحت مستوى اللثة بمسافة كبيرة اكتر من 2-3 مم فده بيأكد وجود Altered Passive Eruption.

• التصميم الرقمي للابتسامة Digital Smile Design DSD: باستخدام صور وبرامج متخصصة تقدر تحدد الطول والعرض المثاليين للأسنان وتقارنهم بالوضع الحالي وده بيديك دليل قاطع على وجود قصر في التاج (1).

٢. قياس طول وحركة الشفة العلوية

هنا بنستخدم وضعيتين للمريض وهو قاعد مستقيم Upright position:

• وضعية الـ M Position الشفاه مسترخية:

  • خلي المريض يقول كلمة زي “امممم” ويقف بحيث تكون شفايفه مسترخية.

  • قيس بالمسطرة المسافة من قاعدة الأنف Base of the Nose لحد الحد السفلي للشفة العلوية Vermilion border.

  • القياس الطبيعي: 20-22 مم للسيدات Females و 22-24 مم للرجال Males. لو القياس طلع اقل من كده يبقى المريض ده عنده قصر في الشفة العلوية Short Lip (2).

• وضعية الـ E Position ابتسامة كاملة:

  • خلي المريض يضحك ضحكة كبيرة وكاملة يقول “اييييي”.

  • قيس نفس المسافة تاني.

  • احسب الفرق بين القياس في وضعية الـ M والقياس في وضعية الـ E.

  • الحركة الطبيعية للشفة بتكون في حدود 6-8 مم. لو الفرق طلع اكبر من 8 مم يبقى المريض ده عنده فرط حركة في الشفة العلوية Lip Hypermobility (2).

٣. تقييم وضع الفك العلوي

لو عملت كل القياسات اللي فاتت ولقيتها طبيعية لكن لسه فيه Gummy smile واضحة يبقى غالباً المشكلة بتكون نمو راسي زائد في الفك العلوي Vertical Maxillary Excess. التشخيص النهائي هنا بيحتاج تحليل اشعة Cephalometric.

ثالثاً: خطة العلاج: لكل سبب… سلاح! Tailoring the Treatment Plan

بعد ما شخصت السبب بدقة اختيار العلاج بيبقى منطقي وسهل:

لو السبب قصر تاج السن Short Clinical Crown:

• الحل: اطالة التاج الجراحية Gingivectomy and/or Crown Lengthening.

  • لو المشكلة لثة زيادة بس بنعمل Gingivectomy بالمشرط او الليزر.

  • لو المشكلة لثة وعضم زيادة بنحتاج نعمل Surgical Crown Lengthening وده بيشمل رفع شريحة لثوية Flap وازالة جزء من العظم الزائد Osseous recontouring عشان نكشف طول السنة الحقيقي (3).

لو السبب حركة الشفة الزيادة Lip Hypermobility:

• الحل: حقن البوتوكس Botox Injections.

  • البوتوكس بيشتغل كمرخي للعضلات Muscle relaxant. لما بنحقن كمية صغيرة ومحسوبة بدقة في العضلات المسؤولة عن رفع الشفة العلوية ده بيقلل من حركتها الزائدة.

  • ميزته: اجراء بسيط وسريع. عيبه: نتيجته مؤقتة بتستمر من 4-6 شهور والمريض بيحتاج يعيد الحقن (4).

لو السبب قصر الشفة Short Lip او الحركة الزيادة اوي:

• الحل الجراحي: جراحة تغيير موضع الشفة Lip Repositioning Surgery.

  • دي عملية جراحية بسيطة بتتعمل في العيادة تحت بنج موضعي. فكرتها اننا بنشيل شريحة من الغشاء المبطن للشفة من جوه وبنخيط الشفة في مكان جديد منخفض اكتر وده بيحد من حركتها.

  • ميزتها: نتيجتها دائمة. عيبها: اجراء جراحي مش كل المرضى بيتقبلوه (5).

لو السبب نمو الفك العلوي الزائد Vertical Maxillary Excess:

• الحل المثالي: جراحة تقويم الفكين Orthognathic Surgery.

  • دي عملية جراحية كبيرة بتتعمل في المستشفى بيتم فيها قطع جزء من الفك العلوي ورفعه لمكانه الصحيح Le Fort I Osteotomy with impaction.

  • ميزتها: بتحل المشكلة من جذورها. عيبها: عملية كبيرة ومكلفة وبتحتاج فترة نقاهة طويلة.

• الحلول البديلة: ممكن نعمل حلول “تمويهية” عشان نقلل من شكل الابتسامة زي اننا نعمل اطالة تاج جراحية عشان نزود طول السن وندمج معاها حقن بوتوكس. النتيجة مش هتكون مثالية زي الجراحة لكنها بتحسن الشكل بشكل كبير.

الخلاصة: التشخيص أولاً ثم العلاج

معظم حالات الـ Gummy Smile اللي بنشوفها في العيادة بتكون مزيج من الأسباب وغالباً بنقدر نحلها بشكل ممتاز عن طريق اطالة التاج الجراحية Crown Lengthening لوحدها او بدمجها مع حقن البوتوكس.

الجراحات الأكبر بتفضل خيارات متاحة للحالات الأصعب.

مفتاح النجاح هو انك متتسرعش في اقتراح الحل. خد وقتك في الفحص والقياس والتشخيص واعرض على المريض كل الخيارات بمميزاتها وعيوبها وخليه شريكك في القرار.