Metapex و Metapaste: الفرق بينهم و إمتى نستخدم كل واحد؟

كلنا بنبقى في نص جلسة اندو والحالة necrotic، وبنكون محتاجين نقفل على كده ونكمل جلسة تانية. وهنا بيجي السؤال اللي دايماً محير: احط ايه جوه القناة؟ فيه لاعبين كبار في السوق، اشهرهم اتنين اسمهم وشكلهم قريب جداً من بعض: الميتابيكس Metapex و الميتاباست Metapaste.

الاتنين شكلهم قريب. واسمهم قريب. والمادة الفعالة واحدة. بس الحقيقة انهم مختلفين تماماً في كل حاجة تقريباً. في تركيبهم وطريقة شغلهم واستخداماتهم. ولو استخدمت واحد مكان التاني انت مش بس ممكن تبوظ الحالة، انت ممكن تعمل مشاكل انت في غنى عنها.

في المقالة دي احنا هنحط النقط على الحروف. هنعمل مقارنة عملية جداً عشان تعرف تختار صح كل مرة.

اولاً: الفرق من المصنع… التركيب الكيميائي Chemical Composition

عشان نفهم القصة، لازم نبدأ من الأصل. ايه اللي جوه كل سرنجة منهم؟

• الميتاباست Metapaste:

  • ده بتاع الشغل البسيط والفعال.

  • لونه: بيكون أبيض في العيادة، وبيبان أبيض فاتح في الأشعة.

  • مكوناته: حاجتين اتنين وبس:

    1. هيدروكسيد الكالسيوم Calcium Hydroxide: ده البطل بتاعنا. شغلته انه يعمل بيئة قلوية جداً High pH تقتل البكتيريا وتشجع الأنسجة انها تلتئم.

    2. كبريتات الباريوم Barium Sulfate: دي مادة مالهاش اي دور علاجي. وظيفتها الوحيدة انها مادة ظليلة للأشعة Radiopaque عشان تخليك تشوفها كويس في فيلم الأشعة.

• الميتابيكس Metapex:

  • ده بقى بتاع المهمات الخاصة، معاه سلاح زيادة.

  • لونه: بيكون أصفر في العيادة وفي الأشعة.

  • مكوناته:

    1. هيدروكسيد الكالسيوم Calcium Hydroxide: البطل الأساسي موجود هنا برضه.

    2. اليودوفورم Iodoform: ده هو السلاح الزيادة والفرق الجوهري. اليودوفورم ده مركب له تأثير قوي جداً كمضاد للبكتيريا Antiseptic and Antibacterial، وهو اللي بيدي للميتابيكس لونه الأصفر وريحته المميزة.

الزتونة: يعني الزتونة كلها في اليودوفورم Iodoform اللي في الميتابيكس، وده بيديله قوة تطهير زيادة.

ثانياً: السهل والصعب… الذوبانية والازالة Solubility and Removal

دي يمكن اهم نقطة عملية هتفرق معاك في العيادة.

• الميتاباست Metapaste: ده صاحبك اللي مش هيتعبك. مادة بتدوب في المية Water Soluble. يعني لما تيجي تشيله في الجلسة التانية، الموضوع بيبقى سهل جداً. شوية irrigation بصوديوم هيبوكلورايت او سالاين، مع فايل بسيط، هتلاقي القناة رجعت نضيفة تماماً.

• الميتابيكس Metapex: ده بقى اللي ممكن يكرهك في عيشتك لو استخدمته غلط. مادة زيتية Oil-Based. يعني مش بيدوب في المية. وده بيخليه صعب جداً في الازالة. لو حاولت تشيله بالـ irrigation بس، هتلاقي طبقة زيتية لزجة ماسكة في جدران القناة ومش راضية تطلع. والطبقة دي بتعمل حاجز بيمنع السيلر Sealer بتاعك انه يلزق كويس في الحشو النهائي.

ثالثاً: امتى تستخدم كل واحد؟ Clinical Indications

بناءً على الفروق اللي فوق دي، كل واحد فيهم له ملعب مينفعش يلعب في ملعب التاني.

• استخدامات الميتابيكس Metapex: بتاع الأطفال وبس

  • الميتابيكس بتركيبته الزيتية واليودوفورم، استخدامه بيكون تقريباً بس في الأسنان اللبنية Deciduous Teeth في الحالات دي:

    • حشو قنوات الجذور في الأسنان اللبنية Primary Tooth Pulpectomy: لأنه مادة قابلة للامتصاص Resorbable، يعني بتدوب مع الوقت بنفس سرعة امتصاص جذر السنة اللبنية، فمبتعملش مشكلة للسنة الدائمة اللي تحتها.

    • تكوين قمة الجذر في الأسنان اللبنية Apexification in Primary Teeth.

    • علاج الامتصاص الداخلي Internal Resorption في الأسنان اللبنية.

تحذير بحجم العيادة: اوعى ثم اوعى تستخدم الميتابيكس كحشو مؤقت بين الجلسات في سنة دائمة Permanent Tooth. صعوبة ازالته ممكن تبوظلك الحشو النهائي كله.

• استخدامات الميتاباست Metapaste: خبير الأسنان الدائمة

  • الميتاباست بتركيبته المائية وسهولة ازالته، هو اختيارك الأول والأساسي في الأسنان الدائمة Permanent Teeth في الحالات دي:

    • حشو مؤقت بين الجلسات Intracanal Medicament: دي وظيفته الأساسية. بتحطه عشان تضمن ان القناة تفضل متعقمة بين الجلسات.

    • القنوات اللي فيها افرازات Exudate/Weeping Canals: لو عندك قناة مش راضية تنشف، هيدروكسيد الكالسيوم بيساعد جداً في تجفيفها.

    • علاج امتصاص الجذر الداخلي والخارجي Internal and External Root Resorption: البيئة القلوية اللي بيعملها ممكن توقف نشاط الخلايا اللي بتآكل الجذر (1).

    • تكوين قمة الجذر في الأسنان الدائمة Apexification in Permanent Teeth: هو المادة الكلاسيكية اللي بنستخدمها عشان نعمل حاجز صلب عند قمة الجذر المفتوح.

رابعاً: ازاي اشيل الميتابيكس لو اضطريت؟ The Metapex Removal Trick

بما انه صعب في الازالة، فيه حيلة بسيطة بنعملها عشان نسهل الموضوع.

1. متوصلش للآخر: وانت بتعمل Cleaning and Shaping في اول جلسة، اوعى توصل للـ Master Apical File بتاعك. اقف على المقاس اللي قبله Second to Last File.

2. احقن الميتابيكس واقفل.

3. في الجلسة التانية: كل اللي هتعمله انك هتدخل بالـ Master Apical File بتاعك. الفكرة انك بتستخدم الفايل الأخير كأنه “مقشطة” بتوسع القناة للمقاس النهائي وبتشيل معاها بقايا الميتابيكس اللي كانت لازقة على الجدران.

خامساً: ليه بنعمل حشو على جلستين اصلاً؟ The Rationale for Multiple Visits

كتير مننا بيفضل يعمل الحشو على جلستين، خصوصاً في حالات الـ Necrotic cases. الفكرة ان في اول جلسة انت بتنضف القناة بشكل ميكانيكي بالفايلات والـ irrigation. لكن بيفضل فيه بكتيريا مستخبية جوه الأنابيب العاجية الدقيقة Dentinal tubules.

وضع هيدروكسيد الكالسيوم Calcium Hydroxide بين الجلسات بيشتغل كـ “تطهير كيميائي” طويل المفعول بيقضي على البكتيريا اللي فضلت دي. دراسة مهمة في Journal of Endodontics سنة 2012 اثبتت ان استخدام هيدروكسيد الكالسيوم بين الجلسات بيحسن جداً من حالة القناة وبيقلل عدد البكتيريا بشكل واضح (2).

سادساً: صلاحية الميتاباست جوه القناة (Metapaste’s Limited Effectiveness)

بما ان الميتاباست بيدوب في المية، فهو كمان بيدوب في سوائل الأنسجة اللي في منطقة قمة الجذر. عشان كده، فعاليته بتستمر حوالي 7 أيام بس. بعد الفترة دي بيكون داب تقريباً ومبقاش له تأثير.

لو سبته اكتر من اسبوع او عشر ايام، ممكن يحصل اعادة تلوث للقناة Re-infection. وده بيبان في الأشعة كأن القناة فاضية Hollow Canal Effect (3).

الخلاصة: مينفعش تسيب الميتاباست اكتر من اسبوع لعشر ايام بالكتير. لو المريض هيتأخر، الأفضل تجيبه تشيل القديم وتحط جديد.

سابعاً: ليه الميتابيكس بيقعد فترة اطول؟

زي ما قلنا، الميتابيكس مادة زيتية. ده بيخلي عملية اطلاق ايونات الكالسيوم Calcium Release منه أبطأ بكتير من الميتاباست المائي. عشان كده بيحتاج فترة أطول جوه القناة عشان يدي تأثيره الكامل، والمدة دي ممكن توصل لـ 14 يوم او اكتر.

جدول المقارنة السريع The Cheat Sheet