فيه فيلم رعب بيتكرر كل يوم تقريباً في عياداتنا. ام داخلة قلقانة جداً وبتقولك “يا دكتور ابن جارتنا اللي اصغر من ابني طلع كل سنانه وابني لسه هو كده فيه مشكلة؟” او الشكوى الأشهر “يا دكتور السنة اللبنية وقعت وبقالها ست شهور ومفيش حاجة طلعت مكانها انا قلقانة جداً”.
الأسئلة دي رغم بساطتها بتسبب قلق حقيقي عند الأهل ولازم احنا كدكاترة نكون جاهزين نرد عليها بثقة وعلم. موضوع بزوغ الأسنان Tooth Eruption ده واسع وفيه اختلافات طبيعية كتير بين الأطفال. لكن امتى التأخير ده بيكون مجرد اختلاف طبيعي وامتى بيكون علامة على وجود مشكلة حقيقية محتاجة تدخل مننا؟
في المقالة دي هنحطلك دليل عملي وواضح. هنفصص اسباب تأخر بزوغ الأسنان وهنقولك بالظبط امتى تطمن الأهل وامتى تقولهم “لأ هنا لازم نقف ونعمل فحص واشعة”.
أولاً: ايه هو تعريف “التأخير” اللي يقلقنا؟ Defining Pathological Delay
قبل ما نجري ونقول فيه مشكلة لازم نعرف ايه هو الطبيعي. فيه اختلافات كبيرة جداً في مواعيد بزوغ الأسنان بين الأطفال وده طبيعي تماماً. لكن كقاعدة عامة بنبدأ نقلق ونعتبر الموضوع محتاج فحص لو حصل حاجة من دول:
-
مفيش اي سن بازغ في الفم والطفل وصل لعمر 18 شهر بالنسبة للأسنان اللبنية.
-
مرور اكتر من 6 الى 12 شهر على سقوط السن اللبني بدون ظهور السن الدائم مكانه خصوصاً لو السن المقابل في الناحية التانية Contralateral tooth طلع من فترة. (1)
-
الأشعة X-ray تبين ان تكوين الجذر اكتمل لـ 2/3 او 3/4 طوله والسن لسه مبزغش.
لو اي شرط من دول متحققش فغالباً الموضوع مجرد اختلاف في النمو الطبيعي ومحتاج متابعة بس.
ثانياً: ليه السن بيتأخر؟ الأسباب من النادر للشائع Causes of Delayed Eruption
لما بنتكلم عن الأسباب لازم نقسمهم لمجموعتين. اسباب عامة نادرة واسباب موضعية شائعة جداً وهي اللي بنشوفها كل يوم.
ا. اسباب عامة Systemic Causes – نادرة لكن خطيرة
دي حاجات ليها علاقة بصحة الطفل العامة ورغم انها نادرة لازم تكون في بالك عشان لو شكيت فيها لازم تحول الطفل لطبيب اطفال فوراً.
-
نقص حاد في التغذية Severe Malnutrition: زي نقص البروتين Protein او فيتامين د Vitamin D بشكل كبير جداً.
-
مشاكل في الغدد: اشهرها قصور الغدة الدرقية Hypothyroidism.
-
متلازمات جينية Genetic Syndromes: زي متلازمة داون Down Syndrome او خلل التنسج الترقوي القحفي Cleidocranial Dysplasia.
ب. اسباب موضعية Local Causes – دي اللي بنشوفها 99% من الوقت
دي الأسباب اللي ليها علاقة بالأسنان والفك نفسه وهي دي اللي احنا كدكاترة سنان بنتعامل معاها مباشرةً.
-
قلة المساحة Lack of Space: ده هو السبب رقم واحد والأكثر شيوعاً على الإطلاق. بيحصل غالباً بسبب الخلع المبكر للسن اللبني Early loss of primary teeth فالأسنان اللي جنبه بتتحرك وتقفل المسافة. السن الدائم بييجي يطلع يلاقي الباب مقفول.
-
تليف اللثة Gingival Fibrosis: ساعات لما بنخلع سن لبني بدري اللثة فوقه بتفضل تلتئم وتكون نسيج ليفي سميك عامل زي “الكاوتش”. السن الدائم بيحاول يطلع لكن مش بيقدر يخترق النسيج السميك ده.
-
كيس البزوغ Eruption Cyst/Hematoma: بتشوفها كتير. بتلاقي “كيس” منفوخ ولونه مزرق Bluish swelling فوق مكان السن اللي بيطلع. ده ببساطة تجمع لسائل او دم بين السنة واللثة.
تكة من Dr. LOD: لما تشوف كيس البزوغ اول حاجة تعملها هي انك تطمن الأم. 90% من الحالات دي بتختفي لوحدها والسن بيطلع من غير اي تدخل. لو الكيس كبير ومؤلم ممكن تعمل شق جراحي بسيط جداً Simple incision عشان تفضي السائل وتريح السنة تطلع.
-
انحشار السن Impaction: السن بيكون واخد اتجاه غلط او فيه حاجة حايشاه زي سن زائد Supernumerary tooth او ورم حميد Odontoma فبيفضل محبوس جوة العضم.
-
غياب السن الدائم Congenital Absence: ببساطة مفيش سن دائم بيتكون اصلاً عشان يطلع. ده بنعرفه بالأشعة بس.
ثالثاً: امتى لازم اتدخل؟ When to Intervene
التدخل مش معناه دايماً خلع او جراحة. التدخل بيبدأ بالتشخيص الصح.
القاعدة الدهبية: اي تأخير في البزوغ ينطبق عليه الشروط اللي قلناها في الأول خطوتك الأولى هي طلب اشعة فوراً. غالباً اشعة بانوراما Panoramic X-ray بتكون كافية جداً عشان تديلك صورة كاملة عن الوضع.
بناءً على الأشعة والفحص بيكون قرارك:
-
لو السبب قلة مساحة: يبقى الحل هو التقويم Interceptive Orthodontics عشان نفتح المسافة دي.
-
لو السبب تليف اللثة: الحل بسيط جداً. شق جراحي صغير في اللثة فوق السنة Operculectomy عشان تفتح لها الطريق.
-
لو السبب انحشار السن: هنا القرار بيعتمد على نوع السن وسبب الانحشار. ممكن يحتاج كشف جراحي للسن Surgical exposure مع تركيب جهاز تقويم عشان نسحبه لمكانه.
-
لو مفيش سن دائم: هنا لازم نقيم السن اللبني اللي موجود.
رابعاً: حكايات السن اللبني العنيد Retained & Submerged Deciduous Teeth
فيه حالتين خاصتين بالأسنان اللبنية لازم نعرف نفرق بينهم كويس جداً:
١. السن اللبني الباقي Retained Deciduous Tooth
-
ايه ده؟ ده سن لبني بيفضل في مكانه بعد ميعاد خلعه الطبيعي.
-
ليه بيحصل؟ السبب الأكثر شيوعاً هو غياب السن الدائم تحته Missing permanent successor.
-
شكله ايه؟ بيكون في نفس مستوى الإطباق Occlusal plane بتاع الأسنان اللي جنبه وثابت غالباً. السن ده ممكن يعيش في الفم لسنين طويلة جداً وبيكون ليه دور وظيفي مهم.
-
نتدخل؟ طالما السن ثابت وصحته كويسة بنسيبه في مكانه ونتابعه. هو بيشتغل كـ “حافظ مسافة طبيعي”. (2)
٢. السن اللبني الغائر او الملتصق Submerged/Ankylosed Deciduous Tooth
-
ايه ده؟ ده سن لبني بيحصل فيه التحام مباشر بين الجذر والعظم Fused to bone فبيوقف عن البزوغ.
-
شكله ايه؟ دي اهم علامة. بيكون مستواه منخفض عن الأسنان اللي حواليه Infraocclusion. الأسنان اللي جنبه بتكمل بزوغها طبيعي وهو بيفضل “غاطس” لتحت.
-
ليه ده مشكلة؟ السن ده بيعمل مشاكل كتير. بيمنع بزوغ السن الدائم اللي تحته لو موجود وبيسبب ميل للأسنان المجاورة وبيعمل مشاكل في الإطباق.
-
نتدخل؟ نعم وبشكل حاسم. السن الملتصق Ankylosed tooth غالباً بيحتاج خلع جراحي Surgical intervention عشان نسمح للسن الدائم بالبزوغ او عشان نمنع المشاكل اللي بيسببها للأسنان المجاورة. التأخير في خلعه بيصعب الأمور جداً بعدين. (3)
خامساً: البقايا الصامتة Remnants of Deciduous Teeth
ساعات بعد ما السن الدائم يطلع بنكتشف بالصدفة في الأشعة وجود جزء صغير من جذر السن اللبني Root fragment لسه موجود في العضم خصوصاً في منطقة الضواحك Premolar area.
الزتونة: متقلقش منها. البقايا دي غالباً بتكون بدون اي أعراض Asymptomatic ومش بتعمل اي مشاكل. الجسم بيتعامل معاها مع الوقت وبيحصلها امتصاص تدريجي وبيحل مكانها عظم. مش محتاجة اي تدخل طالما مش عاملة اي التهاب او كيس. (4)
الخلاصة: متقلقش بس خليك صاحي
تأخر بزوغ الأسنان موضوع شائع وغالباً اسبابه بتكون بسيطة ومحلية. دورك كدكتور هو انك تكون “المحقق” الذكي. متتسرعش في قرارك ومتطمنش الأهل زيادة عن اللزوم من غير دليل.
البروتوكول بسيط:
-
اسمع شكوى الأهل كويس.
-
افحص فم الطفل بعين خبير.
-
اطلب اشعة لو التأخير فعلاً يستدعي القلق.
-
بناءً على كل المعلومات دي حط خطة علاج واضحة او قرار بالمتابعة واشرحه للأهل بالتفصيل.
لما تمشي بالخطوات دي انت مش بس هتحل المشكلة انت كمان هتكسب ثقة الأهل وهتثبتلهم انك دكتور شاطر ومتمكن.
