قرار انك تسيب الأشعة التقليدية Conventional Radiography وتدخل عالم الأشعة الرقمية Digital Radiography مبقاش اختيار ده بقى اساس شغل اي عيادة حديثة. الـ Dental Sensor مش بس بيديلك صورة دقيقة وسريعة ده كمان بيقلل جرعة الأشعة على المريض جداً وبيخلي شغلك اسهل بكتير.
لكن لما تيجي تاخد قرار الشرا بتلاقي نفسك واقف وسط بحر من الأنواع والمواصفات. ده HD وده Classic وده مقاس 1 وده 1.5 وده ضمانه سنتين وده خمسة! الحيرة دي طبيعية جداً خصوصاً وان السينسور ده استثمار كبير بيوجع القلب في العيادة.
عشان كده في المقالة دي احنا في Dr. LOD قررنا نمسك ايدك ونعدي بيك البحر ده. هنفصصلك اهم 5 مواصفات فنية لازم تبص عليها وانت بتختار وهنعملك مقارنة واضحة لأشهر الأنواع في السوق عشان في الآخر تاخد القرار الصح اللي يناسبك انت.
أولاً: اهم 5 مواصفات لازم تفهمها قبل ما تشتري The 5 Key Specifications
متخليش الأرقام والمصطلحات الصعبة تخضك. ركز في الخمس نقط دول هما اللي بيحددوا جودة السينسور بتاعك.
١. الدقة Resolution: قوة عينك التشخيصية
الدقة ببساطة هي قدرة السينسور انه يوريلك اصغر التفاصيل في صورة الأشعة. زي مثلاً بداية تسوس interproximal صغير او شكل الـ apex بتاع السنة في حالات الـ endo.
-
بتتقاس بايه؟ الوحدة العلمية هي زوج الخطوط في المليمتر Line Pairs per Millimeter او lp/mm. كل ما الرقم ده زاد كل ما السينسور قدر يشوف تفاصيل ادق.
-
الدقة الحقيقية في مقابل النظرية: ركز اوي في النقطة دي. ساعات الشركة بتكتب رقم خرافي كـ “دقة نظرية” Theoretical Resolution لكن “الدقة الحقيقية” Actual Resolution اللي بتظهر في الصورة بتكون اقل. اسأل دايماً عن الدقة الحقيقية.
-
أنواع الدقة في السوق:
-
الكلاسيكية Classic: بتكون اقل من 20 lp/mm. مناسبة للشغل العام زي الخلع والحشو العادي.
-
عالية الوضوح HD: بتكون في حدود 20-25 lp/mm. دي الفئة اللي في النص واكتر فئة متوازنة بين الجودة والسعر.
-
فائقة الدقة Ultra HD: بتكون أعلى من 30 lp/mm. دي بتديك أعلى جودة صورة ممكنة لو انت بتاع endo وعايز تشوف روح الـ Apex بس سعرها بيكون اغلى.
-
٢. الحجم Size: راحة المريض مفتاح الشغل
دي نقطة جوهرية بتأثر على تجربة المريض بشكل مباشر. الفيلم العادي كان مرن لكن السينسور جسم صلب Rigid ولو حجمه كبير شوية ممكن يوجع العيان خصوصاً الأطفال او الناس اللي بقها صغير. والعيان لو اتوجع مش هيقعدلك تاني.
-
المقاسات المتاحة:
-
مقاس 1 Pedo Size: ده اصغر حجم ومثالي للأطفال Pediatric Patients وللأشعة الأمامية anterior PAs في الكبار.
-
مقاس 2 Adult Size: ده الحجم العادي للكبار ومناسب للـ posterior PAs والـ Bitewings.
-
مقاس 1.5 Universal Size: ده بقى الواد الذكي اللي فيهم. حل وسط ممتاز بين 1 و 2. مريح كفاية للأطفال وفي نفس الوقت كبير كفاية عشان يجيب الـ molars في الكبار. يعتبر اكتر خيار عملي لمعظم العيادات.
-
٣. السُمك Thickness: كل ملليمتر بيفرق
زي الحجم بالظبط سُمك السينسور بيفرق جداً في راحة المريض. كل ما كان السينسور ارفع Thinner كل ما كان اسهل في الوضع جوه البق.
الفرق بين 4.4 مم و 5 مم ممكن يبانلك تافه على الورق لكن في بق العيان ده فرق السما من الأرض.
٤. المتانة ومقاومة السوايل Durability and Water Resistance
السينسور ده مش رخيص وهيعيش معاك في بيئة حرب كل يوم. لازم تتأكد انه مصمم عشان يستحمل.
-
معيار الحماية IP Rating: بص دايماً على رقم الـ IP. أعلى معيار موجود دلوقتي هو IP68 وده معناه ان السينسور مقاوم للغبار تماماً ومقاوم للغمس في السوايل. يعني لو وقع في كوباية المطهر بالغلط هتقوله حمدالله على السلامة وهيشتغل تاني.
-
مقاومة الصدمات Shock Resistance: بعض الأنواع زي Xpect Vision بتضيف طبقة حماية زيادة حوالين السينسور عشان تحميه لو وقع منك.
٥. الضمان وخدمة ما بعد البيع The After-Sales Service
ده يمكن اهم عامل بعد جودة الصورة. السينسور جهاز الكتروني ووارد تحصل فيه مشاكل. لازم تتأكد ان الشركة اللي بتشتري منها ليها وكيل محترم وبيرد على التليفون.
-
مدة الضمان: بتختلف من شركة للتانية سنتين تلاتة او خمسة. كل ما زادت المدة كل ما كان ده دليل على ثقة الشركة في منتجها.
-
اسأل عن التفاصيل: الضمان ده استبدال فوري ولا تصليح؟ ايه اللي ممكن يخرج السينسور من الضمان؟
ثانياً: أشهر أنواع السينسورات في مصر (مقارنة سريعة – 2025)
دي مقارنة لأشهر الأنواع في السوق المصري حالياً عشان تساعدك تجمع افكارك. البيانات دي ممكن تتغير دايماً اتأكد من الوكيل.
| الجهاز | الوكيل | الدقة (الحقيقية) | المقاسات | السُمك | IP68 | مقاوم للصدمات | الضمان |
| Xpect Vision | Clinic Store | HD (16-bit) | 1.5 (Universal) | 5 مم | نعم | نعم | 3 سنين |
| XSensor | Truedent | HD (~20 lp/mm) | 1.5 (Universal) | 4.4 مم | نعم | لا | 5 سنين |
| KSensor | Top Medical | HD (~25 lp/mm) | 1 & 2 | 4.4 مم | نعم | لا | سنتين |
| ISensor | Kandeel | HD (~25 lp/mm) | 1 & 2 | 4.4 مم | نعم | لا | سنتين |
| Handy Sensor | Artech | Classic (1.3), HD (2) | 1.3 & 2 | غير محدد | لا | لا | سنتين |
| Nanopix | TDS | Classic (1.3), HD (1, 2) | 1.3, 1, 2 | غير محدد | لا | لا | سنتين/5 سنين |
(ملاحظة: دايماً اسأل الوكيل عن الـ Technical Sheet الكاملة عشان تتأكد من كل المواصفات)
الزتونة: نصايح أخيرة قبل ما تفتح محفظتك
-
انت مين في دول؟ حدد احتياجاتك الأول. لو انت عيادة اطفال بس يبقى مقاس 1 هو الأساس. عيادة عامة يبقى مقاس 1.5 هو الخيار الأذكى. شغلك كله endo ومحتاج تفاصيل يبقى ركز على اعلى دقة lp/mm.
-
اوعى تشتري على صور كتالوجات: اطلب من الوكيل يجيلك العيادة وتجرب السينسور بنفسك على حالات حقيقية وتشوف الصور على شاشتك انت.
-
اسأل عن السوفتوير: السوفتوير اللي بيجي مع السينسور مهم جداً. هل هو سهل ولا هتحتاج كورس برمجة؟ هل فيه ادوات لتحسين الصورة Filters؟
-
اسمع للي لبسوا قبلك: اسأل الدكاترة اللي اشتروا نفس النوع اللي بتفكر فيه. اسألهم عن تجربتهم مع جودة الصورة والأهم تجربتهم مع الوكيل وخدمة ما بعد البيع.
في الآخر اختيار السينسور الصح قرار بيجمع بين عقلك وميزانيتك وراحة مريضك. خد وقتك ادرس كل الخيارات كويس ومتتسرعش. الاستثمار الصح في الأول هيوفر عليك صداع وفلوس كتير في المستقبل.
