دور طبيب الأسنان في الكشف عن سرطان الفم: أهمية الفحص المبكر!

كتير مننا بيشوف شغله في العيادة هو علاج الالم او تجميل الابتسامة وبس. لكن الحقيقة ان دورك اكبر من كدا بكتير انت ممكن تكون السبب الحقيقي في انقاذ حياة بني ادم. بالفحص الدوري البسيط اللي مش بياخد دقيقتين من وقتك انت ممكن تكتشف علامات سرطان الفم Oral Cancer في مراحلها الاولى خالص. ووقتها بتكون فعلاً خط الدفاع الاول للمريض اللي بيثق فيك.

في المقال دا هنتكلم كلام عملي ومباشر. كلام من دكتور لدكتور عن سرطان الفم. هنعرف ايه هو وازاي بعين خبيرة تلقطه بدري في عيادتك وايه المفروض تعمله لو شكيت في اي حاجة.

اولاً: ايه هو السرطان Cancer اصلاً؟

قبل ما ندخل في تفاصيل سرطان الفم خلينا نرجع خطوة لورا. السرطان ببساطة شديدة هو ان خلايا معينة في الجسم بتخرج عن السيطرة. بيحصلها نمو غير طبيعي Uncontrolled Cell Growth وبتبدأ تنقسم بشكل جنوني من غير اي كنترول. التكاثر العشوائي دا بيعمل كتلة اسمها الورم Tumor والورم دا ممكن يكون حميد وممكن يكون خبيث.

ثانياً: ما هو سرطان الفم Oral Cancer؟

سرطان الفم هو نفس الفكرة بالظبط لكن بتحصل في خلايا الفم. هو نمو غير طبيعي لخلايا الانسجة اللي بتبطن تجويف الفم Abnormal Cell Growth in the Oral Cavity. والنمو دا ممكن يحصل في اماكن كتير زي:

• الشفايف Lips

• اللثة Gums

• اللسان Tongue وخصوصاً على الجوانب وفي الجزء الخلفي منه

• بطانة الخد Inner Lining of the Cheeks

• سقف الحلق Palate سواء الصلب او الرخو

• ارضية الفم Floor of the Mouth اللي هي تحت اللسان

اكتر نوع مشهور وبيمثل فوق 90% من كل حالات سرطان الفم هو سرطان الخلايا الحرشفية Squamous Cell Carcinoma. والنوع دا بيصيب الخلايا السطحية اللي مغطية كل الاماكن اللي قلناها فوق.

ثالثاً: ازاي تلقط سرطان الفم في العيادة؟ (الاعراض والعلامات)

دي اهم جزئية في الموضوع كله ليك كدكتور. مشكلة سرطان الفم ان اعراضه في الاول بتبان عادية جداً وممكن تتشابه مع اي قرحة او التهاب بسيط. لكن فيه كلمة سر بتفرق بين الحاجة العادية والخطر وهي “الاستمرارية Persistence”. القرحة العادية اخرها اسبوعين وتخف لكن القرحة السرطانية مبتخفش.

خلي عينك زي الصقر على العلامات دي:

• بقع بيضا او حمرا في الفم White or Red Patches (Leukoplakia/Erythroplakia): اي بقعة لونها ابيض او احمر مبتتشالش بالمسح بالشاش دي علامة خطر رقم واحد. خصوصاً لو كان ملمسها خشن.

• قرحة مش بتخف Non-Healing Ulcer: دي اهم علامة على الاطلاق. القاعدة الذهبية بتقول اي قرحة في الفم يعدي عليها 3 اسابيع ومخفتش لازم تتعامل معاها بجدية. القرحة دي غالباً حوافها بتكون ناشفة ومرتفعة.

• سنة بتتلخلخ من غير سبب واضح Loose Teeth: لو لقيت سن او اكتر بيتلخلخل ومفيش سبب واضح زي التهاب دواعم السن Periodontitis لازم تشك ان فيه ورم بينخر في العضم اللي تحته.

• نمو او كتلة في الفم Growth or Lump in the Mouth: اي كلكيعة او ورم جديد يظهر في اي مكان وخصوصاً لو كان ناشف وثابت في مكانه.

• الم مستمر في الفم Persistent Pain in the Mouth: لو المريض بيشتكي من وجع مستمر في منطقة معينة ومفيش تسوس او التهاب يفسر الوجع دا.

• نزيف من غير سبب Unexplained Bleeding: نزيف بيتكرر من مكان معين من غير سبب واضح.

• صعوبة في البلع او الكلام Difficulty Swallowing or Speaking: لو المريض اشتكى ان الاكل بيقف في زوره او ان طريقة كلامه اتغيرت.

• تغيير في الصوت Voice Changes: زي بحة مستمرة في الصوت Hoarse.

• تنميل او فقدان احساس Numbness: لو المريض بيشتكي من تنميل في جزء من وشه او شفايفه او لسانه.

نقطة مهمة جداً: وجود عرض من دول مش تشخيص نهائي للسرطان. لكن دورك انك متاخدش الموضوع ببساطة. لازم تفحص بدقة وتوجه المريض صح.

رابعاً: ايه اللي بيجيب سرطان الفم؟ (عوامل الخطورة)

مفيش سبب مباشر واحد لكن فيه مجموعة عوامل خطورة Risk Factors بتعلي احتمالية الاصابة جداً ولازم تسأل عنها:

• التدخين واستخدام التبغ Smoking and Tobacco Use: دا المتهم الرئيسي. المدخنين فرصتهم للاصابة اعلى 6 مرات من غيرهم. دا بيشمل كل حاجة سجاير شيشة تبغ ممضوغ (تمباك).

• شرب الكحول بكثرة Heavy Alcohol Consumption: الكحول لوحده خطر ولما بيتجمع مع التدخين الخطر بيزيد اضعاف.

• التعرض الزائد للشمس Excessive Sun Exposure: دا السبب الاساسي لسرطان الشفة السفلية Lower lip cancer.

• فيروس الورم الحليمي البشري Human Papillomavirus (HPV): خصوصاً سلالة HPV-16 اللي بقت سبب رئيسي في زيادة حالات سرطان البلعوم Oropharyngeal cancer عند الشباب.

• التاريخ العائلي Family History of Oral Cancer.

• ضعف المناعة Weakened Immune System: زي المرضى اللي عاملين زراعة اعضاء او المصابين بالايدز.

خامساً: مين اكتر ناس معرضة للخطر؟

اي حد ممكن يصاب لكن الخطر بيزيد في الفئات دي:

• العمر: الخطر بيزيد جداً مع السن واغلب الحالات فوق سن الستين.

• النوع: الرجال اكتر عرضة للاصابة من النساء بنسبة الضعف تقريباً.

• العرق: اصحاب البشرة البيضاء اكتر عرضة من اصحاب البشرة السمراء.

سادساً: هل ممكن نمنع الاصابة؟ (الوقاية)

مفيش ضمان 100% لكن فيه خطوات بتقلل الخطر بشكل كبير جداً:

• الاقلاع عن التدخين والتبغ.

• تقليل شرب الكحول.

• حماية الشفايف من الشمس بمرطب شفاه فيه عامل حماية Lip Balm with SPF.

• والاهم من كل دا: زيارة طبيب الاسنان بانتظام لعمل فحص دوري.

سابعاً: اهمية الكشف المبكر (The Power of Early Detection)

وهنا بيجي دورك الحاسم يا دكتور. سرطان الفم لو اكتشفناه في مراحله الاولى نسبة الشفاء منه بتتجاوز الـ 80-90%. لكن لو اتساب وانتشر النسبة دي بتقع بشكل مرعب. الكشف المبكر هو اللي بيفرق بين علاج بسيط بجراحة صغيرة وعلاج معقد بيشمل جراحة ممكن تشوه المريض وعلاج اشعاعي وكيماوي.

التوصيات بتقول ان كل المرضى لازم يتعملهم فحص لسرطان الفم Oral Cancer Screening بشكل دوري. فيه توصيات بتقول كل 3 سنين للناس من عمر 20 لـ 40 سنة وسنوياً للناس فوق الـ 40 سنة.

تاسعاً: ازاي تعمل فحص سرطان الفم في دقيقتين؟ (The 2-Minute Screening)

الفحص دا بسيط جداً ومش محتاج غير اضاءة كويسة ومراية وشاش.

1. الفحص خارج الفم Extra-oral Exam: بص على وش ورقبة المريض. دور على اي عدم تماثل او كتل او تغيير في لون الجلد. وحسس الغدد الليمفاوية في الرقبة وتحت الفك.

2. الفحص داخل الفم Intra-oral Exam:

   • الشفايف: اقلب الشفة اللي فوق واللي تحت وبص كويس على الانسجة المبطنة.

   • بطانة الخد: استخدم مرايتين عشان تشد الخد وتبص على البطانة من الناحيتين.

   • اللثة: بص على اللثة من كل الزوايا.

   • اللسان: خلي المريض يطلع لسانه. امسك طرفه بشاشة وحركه يمين وشمال عشان تشوف جوانب اللسان كويس (دي من اكتر الاماكن اللي بيظهر فيها). بعدها خليه يرفع لسانه لفوق عشان تفحص ارضية الفم.

   • سقف الحلق: خليه يرجع راسه لورا وبص على سقف الحلق الصلب والرخو.

   • البلعوم: بص على منطقة اللوزتين في الاخر.

لو شكيت في حاجة… اعمل ايه؟ (The Next Step)

لو لقيت اي علامة من اللي قلناهم فوق خصوصاً قرحة بقالها اكتر من اسبوعين او بقعة بيضا او حمرا هنا لازم تتحرك.

• وثّق كل حاجة: صور المكان كويس جداً واكتب وصف دقيق في ملف المريض (الحجم واللون والملمس).

• حدد معاد متابعة قريب: قول للمريض “انا شايف التهاب بسيط هنا وعايز اطمن عليه تاني بعد اسبوعين بالظبط”.

• لو لسه موجودة في المتابعة: هنا مفيش اي هزار. لازم تعمل تحويل Referral فوراً لأخصائي امراض فم Oral Pathologist او جراح فم ووجه وفكين Oral and Maxillofacial Surgeon عشان ياخد عينة Biopsy.

• متخوفش المريض لكن خليك حاسم: متقولوش “انت عندك سرطان”. لكن قوله “فيه تغيير بسيط في الانسجة بقاله فترة ومخفش وعشان نطمن تماماً لازم الاخصائي يبص عليه وياخد عينة صغيرة نحللها”.

دورك كطبيب اسنان هو انك تكون بوابة الاكتشاف المبكر. الفحص الروتيني دا اللي هتعمله في دقيقتين ممكن يكون اهم دقيقتين في حياة المريض اللي بتفحصه.