هامش ربح عيادة الأسنان: إزاي تحسبه صح وتعرف انت كسبان ولا خسران؟

فيه سؤال مهم جداً لازم كل دكتور سنان صاحب عيادة يسأله لنفسه: “انا بكسب كام بجد من عيادتي؟”. الإجابة على السؤال ده مش مجرد “الحمد لله مستورة”، او “آخر الشهر بيفضل معايا كذا”. الإجابة لازم تكون رقم واضح ومحدد اسمه هامش الربح الصافي Net Profit Margin.

كتير مننا بيخلط بين الدخل اللي بيخش العيادة وبين الربح الحقيقي. بنشتغل ونجتهد، وآخر اليوم بنبص على درج الفلوس ونحس اننا عملنا شغل كويس. لكن هل الفلوس دي هي ربحك؟ اكيد لأ.

في المقالة دي، وبمساعدة د. حسام عاشور Dr. Hossam Ashour، هنفكلك شفرة الحسابات دي، وهنعرفك ازاي تحسب هامش ربح عيادتك بطريقة صحيحة وعلمية. معرفة الرقم ده مش رفاهية، دي ضرورة قصوى عشان تعرف تدير عيادتك كـ “بيزنس” ناجح، وتاخد قرارات صح لمستقبلك.

الغلطة القاتلة اللي 90% من الدكاترة بيقعوا فيها

أول وأكبر غلطة بنقع فيها واحنا بنفكر في أرباحنا هي إننا مبنحسبش لنفسنا مرتب. بنعتبر كل الفلوس اللي بتدخل العيادة هي فلوسنا، ونبدأ نصرف منها على الخامات والإيجار والمرتبات، واللي يفضل في الآخر نقول عليه “ربح”.

ده غلط تماماً. انت كدكتور بتشتغل في عيادتك ليك دورين منفصلين:

• دورك كطبيب أسنان Dentist: بتقدم خدمة علاجية وبتبذل مجهود ووقت وخبرة. الدور ده لازم تاخد عليه أجر او نسبة زي أي دكتور تاني بيشتغل عندك.

• دورك كصاحب العيادة Business Owner: بتستثمر فلوسك ووقتك في إدارة المكان وتطويره وبتتحمل المخاطر. الدور ده المفروض يطلعلك ربح على استثمارك.

لو مدخلتش أجرك كطبيب ضمن مصاريف العيادة، انت بتخدع نفسك وبتحسب ربح وهمي مش حقيقي.

المعادلة الصحيحة لحساب هامش الربح The Right Formula

عشان تحسبها صح، لازم تمشي على الخطوات دي بالترتيب:

الدخل Revenue – المصاريف المتغيرة Variable Costs = هامش الربح الإجمالي Gross Profit

هامش الربح الإجمالي Gross Profit – المصاريف الثابتة Fixed Costs = صافي الربح قبل الضرائب والاهلاك Net Profit Before Taxes and Depreciation

تعالوا نفصص كل مصطلح من دول عشان نفهمه كويس.

١. الدخل Revenue

ده أبسط جزء في المعادلة. هو كل الفلوس اللي بتدخل العيادة من أي مصدر، زي:

• أتعاب علاج المرضى Patient Fees.

• فلوس بيع أي منتجات زي فرش أسنان او معجون.

٢. المصاريف المتغيرة Variable Costs

دي هي المصاريف اللي بتزيد وتقل مع حجم الشغل. يعني لو اشتغلت حالات كتير، المصاريف دي بتزيد. لو قعدت أسبوع من غير شغل، المصاريف دي بتبقى صفر. زي ايه؟

• تكلفة الخامات والمستلزمات Cost of Materials: الكومبوزيت، البوند، الجوانتيات، كل حاجة بتستهلكها مع كل حالة.

• فواتير المعمل Lab Fees: تكلفة التركيبات والتقويم اللي المعمل بيبعتها لك.

• نسبة الدكتور المعالج Dentist’s Commission: دي أهم نقطة. لازم تحدد لنفسك نسبة (زي 30% او 40% مثلاً) من سعر كل إجراء بتعمله، وتدخلها ضمن المصاريف المتغيرة. حتى لو انت صاحب العيادة.

• مرتبات المساعدين (لو بالحالة): لو المساعدة بتاخد نسبة على كل حالة، مرتبها هنا متغير.

• تكلفة الخدمات الإلكترونية (لو بالحالة): زي تكلفة تصميم الـ Surgical guide لكل حالة زراعة.

• تكلفة فيلم الأشعة X-ray Film/Sensor Cost: حتى لو الجهاز بتاعك، كل صورة بتصورها ليها تكلفة استهلاك.

٣. المصاريف الثابتة Fixed Costs

دي هي المصاريف اللي بتدفعها كل شهر سواء اشتغلت أو لأ. زي:

• الإيجار Rent.

• مرتبات الموظفين الثابتة Salaries: زي السكرتيرة والمساعدة (لو مرتبها ثابت).

• فواتير كهربا ومية ونت Utilities and Subscriptions.

• مصاريف التسويق والدعاية Marketing Costs.

• رسوم النقابة والبلدية والتراخيص Taxes and Fees.

• تكلفة التخلص من النفايات الطبية Medical Waste Disposal.

٤. الإهلاك والضرائب (حسابات المتقدمين)

دول بييجوا في الآخر عشان نوصل لصافي الربح النهائي.

• الاهلاك Depreciation: ده مش مصروف بتدفعه كاش، لكنه بيعبر عن قيمة الانخفاض في سعر أصولك مع الوقت. كرسي الأسنان اللي اشتريته بـ 100 ألف، بعد سنة قيمته بتقل. المحاسب بيحول الانخفاض ده لمصروف عشان يقلل وعاءك الضريبي.

• الضرائب Taxes: دي آخر مصروف بتخصمه قبل ما توصل لصافي الربح النهائي Net Profit.

المعيار المقارن Benchmark: عيادتي كسبانة ولا لأ؟

طيب، بعد ما عملت كل الحسابات دي وطلعت رقم صافي الربح، ازاي تعرف الرقم ده كويس ولا وحش؟ هنا بنستخدم حاجة اسمها المعيار المقارن او الـ Benchmark. ده متوسط هامش الربح في نفس المجال بتاعك وفي نفس البلد.

في طب الأسنان في مصر، يعتبر متوسط هامش الربح الصافي Net Profit Margin المقبول هو من 15% إلى 35% من إجمالي الدخل.

• لو هامش ربحك في النطاق ده: مبروك، عيادتك صحية ماديًا وماشية كويس.

• لو أقل من 15%: يبقى فيه مشكلة. يا إما مصاريفك عالية جداً، يا إما تسعيرك قليل جداً، ومحتاج تراجع نفسك.

• لو أعلى من 35% بكتير: ده مؤشر كويس، لكن برضه يستدعي انك تراجع حساباتك تاني بدقة، ممكن تكون نسيت تخصم مصروف مهم (زي مرتبك الشخصي!).

ليه كل الصداع ده مهم أصلاً؟ The Importance of Knowing Your Numbers

معرفة هامش ربحك مش مجرد أرقام على ورق. دي أداة قوية جداً بتساعدك تاخد قرارات مصيرية في عيادتك:

• دراسات الجدوى Feasibility Studies: قبل ما تفكر تفتح عيادة جديدة او فرع تاني، لازم تعمل دراسة جدوى مبنية على الأرقام دي عشان تعرف المشروع مجدي ولا لأ.

• إدارة البيزنس Business Management: بتخليك تفصل بين دورك كطبيب ودورك كمدير، وتعرف تدير العيادة بعقلية البيزنس الناجح.

• قرارات الاستثمار Investment Decisions: لما تفكر تشتري جهاز CBCT جديد او تطور العيادة، هتقدر تحسب بسهولة هل العائد على الاستثمار ده يستاهل ولا لأ.

• اتفاقيات الشراكة Partnership Agreements: لو هتشارك دكتور تاني، الأرقام دي هي الأساس اللي بتبنوا عليه اتفاقيتكم عشان محدش يجي على التاني.

• الحماية القانونية Legal Protection: حساباتك المنظمة بتحميك من أي مشاكل مع الضرائب او أي جهات حكومية.

• الالتزامات الدينية Religious Obligations: بتخليك تقدر تحسب “الزكاة” على أرباحك بشكل دقيق وصحيح.

في النهاية، عيادتك مش بس مكان بتمارس فيه شغفك كطبيب، دي كمان مشروعك واستثمارك. وكل ما كنت فاهم أرقام مشروعك أكتر، كل ما قدرت تكبره وتطوره وتضمن استمراره ونجاحه.