يا دكاترة، مين فينا ما واجهش صعوبة في خلع ضرس العقل العلوي (Upper Third Molar)؟ 😩 غالبًا بنضطر ندي بنج ونحط Elevator بالإحساس كده من غير ما نشوف كويس، وده طبعًا بيزود من احتمالية حدوث مشاكل ومضاعفات.
في البوست ده على “دكتور لود”، هنشرحلكم إيه سبب المشكلة دي، وإيه الحل السحري اللي هيخليك تشوف كويس وتخلع ضرس العقل العلوي بسهولة وأمان! 💪
أولاً: إيه سبب صعوبة الرؤية في ضرس العقل العلوي؟
-
أغلبنا بيطلب من المريض يفتح بوقه على آخره علشان نشوف الضرس كويس، بس للأسف ده بيعمل العكس!
-
لما المريض بيفتح بوقه جامد أوي، بتتحرك “النتوء التاجي” (Coronoid Process) لقدام ولتحت وبتسد “التجويف الدهليزي الخدي” (Buccal Vestibule) تمامًا!
-
وبكده بنضطر ندي بنج ونحط Elevator في أي مكان من غير ما نشوف كويس، وده طبعًا خطر جداً.
ثانيًا: إيه الحل عشان نشوف كويس ونحسّن الوصول للضرس؟
-
الحل بسيط جداً: بدل ما نخلي المريض يفتح بوقه على آخره، هنطلب منه يفتحه “شوية صغيرة بس”.
-
لو هتخلع ضرس العقل العلوي الشمال مثلاً، اطلب من المريض يحرّك فكه لجهة الشمال وهو فاتح بوقه شوية صغيرة.
-
هتلاحظ إنّ الدنيا “نورت” 💡 وبقيت شايف كويس أوي وتقدر تحدد مكان البنج (Infiltration أو PSA) وتخلع الضرس بسهولة وأمان!
التقنية دي مفيدة جداً كمان لو فيه “جذور متبقية” (Remaining Roots) ومش عارف تشوفها كويس.
