يا دكاترة، مشكلة تقابلنا كتير في عياداتنا، نخلص حشو العصب على أكمل وجه ونلاقي الأوبتريشن طلع قصير! طب نعمل إيه في الموقف ده؟ نستسلم ونعيد من الأول ونضيع مجهودنا ومجهود المريض المسكين، ولا نسكت ونعديها ونشوف هيحصل إيه؟ 😰
في البوست ده على “دكتور لود”، هنحاول نجاوب على السؤال ده ونشرحلك إمتى تعدي الموضوع وإمتى لازم تصلّح الغلط، عشان راحة ضميرك وصحة مرضاك أهم حاجة! 💪
قبل ما تاخد القرار، اسأل نفسك الأسئلة دي:
-
هو أنا كنت واصل للـ Working Length أثناء التحضير، ولا شغال قصير من الأول؟ 🤔
-
السنة كانت حيّة (Vital) ولا ميتة (Necrotic)؟
-
كنت مستخدم عازل مطاطي (Rubber Dam) ولا قطن بس، ولا مش مستخدم حاجة أصلاً؟ 😅
-
إيه نوع الـ Sealer اللي استخدمته؟ ( قابل للذوبان زي ZnO، ولا غير قابل للذوبان زي الـ Bioceramics والـ GI based sealer؟)
يلا بينا نشوف إجابة كل سؤال هتفرق معانا إزاى:
١. طول العمل:
-
لو كنت واصل للـ Working Length أثناء التحضير والـ Cone بس هو اللي طلع قصير في الأخر، فمعنى كده إن الجزء اللي فاضل نظيف ومفيهوش بكتيريا وممكن تعديها.
-
أما لو كنت شغال قصير من الأول، يبقى لازم تعيد من جديد عشان تضمن نتيجة سليمة.
٢. حالة السنة:
-
السنة الحيّة (Vital) بيبقى فيها كمية بكتيريا أقل بكتير من السنة الميتة، وبالتالي الـ Prognosis بيبقى أفضل.
٣. العزل:
-
طبعًا العازل المطاطي (Rubber Dam) أفضل بكتير من القطن أو الشغل من غير عزل تمامًا، علشان بيضمن لك بيئة عمل معقّمة ويقلل من دخول البكتيريا للـ Canal.
٤. نوع الـ Sealer:
-
الـ Sealer القابل للذوبان ممكن يسبّب مشاكل على المدى الطويل، لأنه هيدوب ويخلّي فيه مكان للبكتيريا إنها تدخل وتعمل التهاب تاني.
-
أما الـ Sealer اللي مش بيّدوب، فهو أفضل بكتير علشان بيفضل ثابت في مكانه ويمنع دخول البكتيريا.
-
الـ Bioceramics ليه ميزة تانية، وهو إنه بياخد وقت على ما ينشف تمامًا، فلو الـ Cone طلع قصير تقدر تشيله وتحط غيره بسهولة.
يبقى في الأخير، القرار محتاج منّك تقييم الموقف كويس وتشوف إيه اللي يضمن أحسن نتيجة لعلاج المريض.
