فايل اندو اتكسر؟ إوعى تقلق.. الـ Bypass ليه حل!

يا دكاترة، مش عيب إنّ ملف / فايل يتكسر معانا واحنا بنشتغل حشو عصب، المهم نعرف نتعامل مع الموقف ونحل المشكلة!

في البوست ده هنتكلم عن:

• أسباب كسر الملفات.

• إزاي نعمل Bypass باحترافية.

• نصايح مهمة علشان نتجنب المشكلة دي من الأساس.

يلا بينا! 👇

ليه ملفات حشو العصب بتتكسر؟

1. القنوات المتعرجة (Dilacerated Canals):

   • القنوات دي لها طريقة شغل خاصة ومينفعش نستخدم معاها نفس أسلوب القنوات المستقيمة، علشان كده الملف بيتكسّر بسهولة.

2. فتحة الدخول غير مناسبة (Incomplete Access):

   • لو فتحة الدخول ضيقة، الضغط على الملف هيزيد وهيتعرض للإنكسار.

3. إرهاق الملف من كتر الاستخدام (Cyclic Fatigue):

   • كل أنواع الملفات مهما كانت جودتها مصممة لاستخدام واحد بس، لو استخدمناها كتير هتضعف وتتكسر.

4. الضغط الزائد على الملف (Excessive Torque):

   • كل نظام Rotary ليه سرعة وضغط محددين، لو زودناهم عن اللازم الملف هيتكسر، خصوصاً لو بندوس عليه بقوة كمان.

5. طريقة استخدام الملف غلط (Wrong Motion):

   • ملفات الـ Rotary مش بتحتاج قوة، المفروض تستخدم حركة خفيفة زي حركة فرشاة الرسم (Brushing Motion).

6. عدم استخدام السائل المزلّق (Absence of Lubrication):

   • الشغل من غير سائل مزلق بيزود الاحتكاك وبيأدي لتكسير الملف سواء كان Manual أو Rotary.

7. عدم استخدام الملفات بالتسلسل (Not Using Rotary Instrument in Sequential Order):

   • ممنوع نستخدم الملفات بشكل عشوائي أو نتخطى مقاسات، لازم نستخدمها بالتدريج زي ما الشركة المنتجة محددة.

طيب لو الملف اتكسر نعمل إيه؟ (Bypass) 💪

1. نحدد مكان الملف المكسور بالأشعة.

2. نوسّع فتحة الدخول بشكل مستقيم.

3. نستخدم سائل غسيل بوفرة لتسهيل الحركة.

4. لو بنستخدم ملفات يدوية (Manual) نوسّع الجزء العلوي من القناة باستخدام Gate Gliden Burs بالتدريج.

5. لو بنستخدم Rotary، ممكن نبدأ بـ Orifice Opener على طول.

6. نبدأ نستخدم ملفات K-files بمقاسات صغيرة (6، 8) بحركة لفّ خفيفة، وندخل من الجهة الداخلية (Buccally/Lingually) لجهة الملف المكسور.

7. ممنوع الضغط على الملف بقوة عشان ما يتكسّرش هو كمان.

8. نكمل الـ Bypass لحد مقاس 15 وبعدين نكمل بملفات Rotary بشكل طبيعي.

ملاحظات مهمة:

• لو الملف اتكسر في الجزء العلوي من القناة لازم نحاول نشيله خالص.

• ممكن الملف يتكسر في قناة مستقيمة، وده ما يدلش على قلة خبرة الدكتور، ممكن يكون بسبب تغيّر غير متوقع في شكل القناة.