تخيل Facial nerve paralysis مع ال maxillary anesthesia!

ا دكاترة، إحنا متعودين إن شلل العصب الوجهي (Facial Nerve Paralysis) بيحصل مع بنج الفك السفلي (IANB)، لكن الحقيقة إن ده مش دايماً صح. صحيح إن حدوثه مع بنج الفك السفلي قليل، لكنه ممكن يحصل – وإن كان نادر جدًا – مع بنج الفك العلوي (Maxillary Anesthesia) كمان! 😮

إزاي بيحصل شلل العصب الوجهي؟

شلل العصب الوجهي يا إما بيحصل فوري (Immediate)، وده بيكون بسبب تأثير مباشر للبنج على العصب الوجهي (Direct Anesthetization of Facial Nerve)، وده اللي بيحصل مع بنج الفك السفلي لما الإبرة تسرح مننا ومتخبطش في العظم.

أو ممكن يحصل متأخر (Delayed) بعد ساعات أو حتى أيام من إعطاء البنج. النوع ده ليه أسباب كتير، لكن أشهرها:

1. إصابة مباشرة للعصب الوجهي بالإبرة (Direct Trauma of the Facial Nerve): وده مش وارد أوي في حالة بنج الفك العلوي، لأننا بنبقى شغالين بعيد عن العصب.

2. تأثير البنج أو نواتج تحلله على الأوعية الدموية المغذية للعصب (Vasa Nervosa): البنج أو المواد اللي بتنتج من تحلله ممكن تعمل تشنج متأخر (Delayed Reflex Spasm) في الأوعية الدموية المغذية للعصب الوجهي، وده يسبب التهاب العصب نتيجة نقص التروية (Ischemic Neuritis).

3. حقن البنج بالغلط في الشريان السنخي العلوي الخلفي (Retrograde Injection in the Posterior Superior Alveolar Artery): وده السبب الأقرب للتصديق، ووارد جدًا يحصل خصوصًا وإحنا شغالين في المنطقة الخلفية من الفك العلوي. البنج ممكن يمشي عكس اتجاه الدم من الشريان السنخي العلوي الخلفي للشريان السحائي الأوسط (Middle Meningeal Artery)، ومنه للفروع الصخرية (Petrosal Branches) بتاعة العصب الوجهي، ويسبب شلل مؤقت.

علشان كده دايماً بنقول، اختبار سحب الدم (Aspiration) قبل الحقن مش رفاهية، وده علشان نتأكد إن إبرة البنج مش جوه شريان. 💉

إيه هي أعراض شلل العصب الوجهي؟

• المريض مش هيقدر يقفل عينه كويس.
• ممكن يحصل تهيج في القرنية (Corneal Irritation)، وده ممكن يطور لقرحة في القرنية (Corneal Ulcer) أو تكثف في القرنية (Keratosis) لو متعالجش.

إزاي نتعامل مع الحالة دي؟

• معظم الحالات بتتحسن لوحدها في خلال أسبوعين.
• يفضل نعرض الحالة على دكتور مخ وأعصاب.
• لازم نكتب للمريض قطرة دموع صناعية (Artificial Tears) زي نورمو (Normo)، ومرهم للعين (Eye Ointment) زي توبراميسين (Tobramycin) أو تيراميسين قبل النوم.
• لو المريض هيتعرض للشمس أو الهوا، لازم يلبس واقي للعين (Eye Patch).